Ձեր վստահելի աղբյուրը

«Ռիո -2016»-ի Օլիմպիական խաղերի հերոսների մեկը` հունահռոմեական ոճի ընբշամարտի օլիմպիական մրցաշարի 66 կգ քաշային կարգում բարձր վարպետությամբ փայլած 27-ամյա ըմբիշ Միհրան Հարությունյանը, ով հոկտեմբերի 19-ին վիրահատության էր ենթարկվել Գերմանիայի Լինբուրգեհոֆ քաղաքի կլինիկաներից մեկում, բժիշկների կանխատեսումների համաձայն` կվերականգնվի շուրջ 7-8 ամիս հետո: Այս մասին տեղեկացնում է Հայաստանի ըմբշամարտի ֆեդերացիայի պաշտոնական կայքը:

Միհրանն աջ ձեռքի վնասվածքն ստացել էր դեռևս 2015 թ. Բաքվում կայացած Եվրոպական մարզական 1 -ին խաղերից առաջ, որտեղ նվաճել էր արծաթե մեդալ: Գերմանիայում Միհրանին ուղեկցող ըմբշամարտի ՀՀ ֆեդերացիայի փոխնախագահ, ըմբիշների օգնության հիմնադրամի նախագահ, մարզական ֆունկցիոներ Արսեն Բադալյանը մանրամասնել է, թե ինչ վիրահատություն է կատարվել: 

«Միհրանն աջ ձեռքի ջիլն ու մկաններն էր վնասել: Վնասվածքն աստիճանաբար ավելի էր խորացել, որն ազդել էր նաև նյարդի վրա: Վիրահատության ժամանակ ոտքի ջիլը տեղադրել են ձեռքին: Հիմա նա արդեն իրեն լավ է զգում: Բժիշկների կանխատեսումների համաձայն` Հարությունյանի վերականգնման փուլը կտևի շուրջ 7-8 ամիս, որից հետո նոր միայն նա կկարողանա վերսկսել մարզումները: Մինչև կիրակի օրը նա կմնա Գերմանիայում, բժիշկների հսկողության ներքո: Հետո արդեն կվերադառնա Երևան և բուժման կուրսը կշարունակի հայրենիքում»,- պատմել է Բադալյանը: