Ձեր վստահելի աղբյուրը

«Մեր հանրապետությունը, տևական ժամանակ կանգնած լինելով ամենատարբեր մարտահրավերների առաջ, շարունակական և նպատակային բարեփոխումների անհրաժեշտություն ունի` երկրի տնտեսության, հասարակական ու քաղաքական կյանքի բոլոր ոլորտներում»,-ԱԺ արտահերթ նիստում «ՀՀ կառավարության ծրագրին հավանություն տալու մասին» հարցի քննարկման ժամանակ ունեցած ելույթում ասաց ԱԺ նախագահ Գալուստ Սահակյանը:

Նրա խոսքով՝ այդ բարեփոխումները սկսել են վաղուց, անցել են բավականին ծանր և դժվարին փուլեր, ներկայում էլ կանգնած են նոր որակի բարեփոխումների իրականացման շեմին:
«Ես համոզված եմ, որ բարեխիղճ ու քրտնաջան աշխատանքի շնորհիվ, անկախ երկրում տեղի ունեցող քաղաքական մրցակցության տարատեսակ դրսևորումներից, մենք ի զորու ենք հաղթահարելու այն բոլոր մարտահրավերները, որոնք ծառանում են մեր երկրի առջև»,- ասաց ԱԺ նախագահը:

Գ.Սահակյանի կարծիքով, կառավարության գործունեության ծրագիրը իրատեսական հիմքի վրա ստեղծված, հստակ գործողություններ ենթադրող և կոնկրետ արդյունքներ ակնկալող փաստաթուղթ է` կառուցված ներկայի հնարավորությունների և ապագայի պատկերացումների վրա:

«Առաջադրելով նոր մոտեցումներ ու գաղափարներ՝ այն հիմնվում է նաև արդեն իսկ իրագործվող կենսունակ գաղափարների ու բարեփոխումների շարունակականության ապահովման մարտավարության վրա, որոնք սկսվել են նախորդ կառավարությունների գործունեության տարիներին և պետք է ապահովեն դրանցով հետապնդվող խնդիրների լուծումը»,- իր ելույթում նշեց Գ. Սահակյանը:

Նրա խոսքով՝ Հայաստանի նոր կառավարությունն իր առաքելությունն ստանձնել է աշխարհաքաղաքական բարդ պայմաններում և խորհրդարանական կառավարման համակարգին անցման ամենապատասխանատու փուլում:

«Սա նշանակում է, որ նոր կառավարությունը պետք է օպերատիվորեն լուծի ոչ միայն երկրի կայուն զարգացման ընթացիկ և ռազմավարական, այլև այդ անցումային փուլում ի հայտ եկող առանձնահատուկ խնդիրները, ընդ որում քաղաքական բարեփոխումների տեսանկյունից շատ կարճ ժամանակահատվածում և կառավարման ոչ ստանդարտ մոտեցումներով: Այս առումով, կարծում եմ, առաջիկա մեկ-երկու տարիներին խորհրդարանին ևս շատ ինտենսիվ աշխատանք է սպասվում կառավարման նոր համակարգի օրենսդրական հիմքերի ձևավորման տեսանկյունից:
Սա այն կարևոր հանգամանքներից մեկն է, որն արտացոլված է նաև կառավարության ծրագրում` մի շարք ոլորտների կտրվածքով առանձնահատուկ ամրագրելով մի քանի ամսից մինչև մի քանի տարվա առաջնահերթ լուծում պահանջող խնդիրներ և դրանց լուծմամբ ակնկալվող կոնկրետ արդյունքներ: Այն ենթադրում է նաև ավելի տքնաջան աշխատանք, ավելի մեծ անձնական ու միաժամանակ միասնական պատասխանատվություն գործադիր և օրենսդիր մարմինների համար»,- ասաց Գ. Սահակյանը:

ԱԺ նախագահը բարձր է գնահատում նաև ծրագրի հիմքում դրված կառավարման արդյունավետության բարձրացմանն ուղղված գաղափարախոսությունը, ինչը, ըստ նրա,  չափազանց կարևոր է Հայաստանի ռեսուրսային սահմանափակ հնարավորությունների, աշխարհաքաղաքական առկա իրողություններով պայմանավորված արտաքին օժանդակության ծավալների նվազման տեսանկյունից:

«Համոզված եմ, որ պետական կառավարման և տեղական ինքնակառավարման մարմինների գործունեության արդյունավետության մակարդակի բարձրացումը ոչ միայն կընդլայնի մեր երկրի ֆինանսական հնարավորությունները, այլև իրական նախադրյալներ կստեղծի բնակչության և իրավաբանական անձանց հարկային ու ֆինանսական «բեռի» զգալի թեթևացման համար»,- նշեց նա:

ԱԺ նախագահը վստահ է, որ կառավարությունը պարտքի ու պատասխանատվության բարձր զգացումով և իրենց  աջակցությամբ կկարողանա իրագործել ծրագիրը: