Մաքսիմալ խնդիր՝ մինիմում ժամանակահատվածում
Կառավարության ներկայացրած ծրագիրը թե՛ կառուցվածքային և թե՛ բովանդակային առումով ակնհայտորեն տարբերվում է նախորդ կառավարությունների ծրագրերից։ Այդ տարբերությունը պայմանավորված է օբյեկտիվ և սուբյեկտիվ հանգամանքներով․ նախ ընդամենը 6 ամիս հետո տեղի են ունենալու խորհրդարանական ընտրություններ, և հետո՝ կառավարության գլուխ կանգնած է ոչ թե դասական քաղաքական գործիչ, այլ պրոֆեսիոնալ կառավարիչ։
Դատելով կառավարության ծրագրի լակոնիկ և խիստ թիրախավորված բովանդակությունից՝ նոր ձևավորված կառավարության առջև դրված խնդիրը բացարձակապես այլ է՝ խիստ կարճ ժամանակահատվածում ապահովել իրական դրական արդյունք, ինչն իր մաշկի վրա պետք է զգա յուրաքանչյուր քաղաքացի։ Ընդ որում՝ այդ գործընթացում երկրորդական պլան են մղվում նույնիսկ իշխանական որոշ «լոկալ բուրգերի» և առանցքային պաշտոնյաների շահերը, որոնք մինչ այդ կարևոր գործառույթ են իրականացրել իշխանության համար։
Քաղաքական նպատակահարմարության տեսանկյունից՝ հասկանալի է, որ ակնկալվող դրական արդյունքը գործող իշխանության կողմից ծառայեցվելու է առաջիկա խորհրդարանական ընտրությունների ընթացքում, որի արդյունքները, փաստացի, որոշելու են իշխանության պահպանման կամ փոխանցման հարցը։ Դրված հստակ խնդիրը բավական է պնդելու համար, որ Կարեն Կարապետյանի կառավարությունը կոչված և դատապարված է դրական շոշափելի արդյունք ապահովելուն՝ թեկուզև հանուն գործող իշխանության քաղաքական շահերի։
Ծրագիրը ծանրակշիռ է դրաձնում այն հանգամանքը, որ այն չի պարունակում վերամբարձ խոստումներ` կապված մեծաթիվ աշխատատեղերի ստեղծման ու գործազրկության կրճատման, աշխատավարձերի, կենսաթոշակների, նպաստների բարձրացման, աղքատության շոշափելի կրճատման հետ: Նման խոստումներն անտրամաբանական և անլուրջ կհնչեին, քանի որ կառավարությունը պաշտոնապես գործելու է մինչև 2017թ-ի մայիսը:
Ներկայացված ծրագրում առավել ուշագրավ է տնտեսական բաժինը, որն ակնհայտորեն աչքի է ընկնում առավել պրակտիկությամբ և կոնկրետ խնդիրների վրա թիրախավորվածությամբ։ Սույն տնտեսական ծրագրում նախորդների համեմատությամբ` ավելի քիչ են հանդիպում հռչակագրային և սկզբունքային բովանդակություն ունեցող խնդիրները, և գերակշռում են այնպիսիները, որոնք չափելի են, ու վերջնական հաշվով հնարավոր է հստակ գնահատական տալ` կառավարությունը կատարե՞լ է իր առջև դրված խնդիրը, թե՞ ոչ:
Ողջ ծրագրում կարմիր թելի պես անցնում է ավելացված արժեք ստեղծող բոլոր տնտեսվարողներին և հատկապես արտահանման միտվածներին` անկախ նրանց չափերից և գործունեության ոլորտից, շոշափելի աջակցություն ցուցաբերելու կառավարության վճռական տրամադրվածությունը: Դրա մասին են վկայում հետևյալ խնդիրների թիրախավորումը. ֆինանսական հաստատություններում գրավադրված կամ առկա չգործող ակտիվների վերագործարկում, նվազ հանրային վտանգավորություն ունեցող իրավախախտումների ապաքրեականացում, արտահանման խրախուսման նպատակով ԱԱՀ-ի վերադարձման ժամկետների փուլային կրճատում, բնական գազի սակագնային քաղաքականության փոփոխություն, մասնագիտացված արտահանող կառույցների ձևավորման և հզորացում, հավատարմագրման ազգային համակարգի միջազգային ճանաչման ձեռքբերում, օրինապահ հարկատուների գործունեության համար առավել բարենպաստ պայմանների ստեղծում, հարկ վճարողների ռիսկայնության աստիճանը գնահատող չափանիշների վերանայում և մի շարք այլ նախագծերը։
Դեռևս դժվար է կանխատեսումներ կատարել կառավարության հաջողել-չհաջողելու վերաբերյալ, սակայն մեկ բան պարզ է․ Կարեն Կարապետյանի գլխավորած կառավարության առջև դրված է մաքսիմալ ծրագիր մինիմալ ժամանակահատվածում, որի արդյունքից շատ բան ուղղակիորեն կախված կլինի առաջիկա ընտրություններում։
Գոռ Ծառուկյան
Հարակից հրապարակումներ`
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
