Ձեր վստահելի աղբյուրը

Այսօր «Sputnik Արմենիա» մամուլի կենտրոնում տեղի ունեցավ մուլտիմեդիոն մամուլի ասուլիս, որին Մինսկից մասնակցեցին «Արարատ» հոկեյի հայկական ակումբի ղեկավարությունն ու խաղացողները։

«Արարատ» ակումբը 2016-2017 թթ. խաղաշրջանում առաջին անգամ մասնակցում է Բելառուսի Հանրապետության հոկեյի բաց առաջնության բարձրագույն լիգային։ 2015-2016թթ.-ի խաղաշրջանում թիմը հանդես է եկել պատանեկան լիգայում և 11 թիմի շարքում զբաղեցրել 6-րդ տեղը։ Այս խաղաշրջանում «Արարատը» ելույթ է ունենում մեծահասակների առաջնությունում և այս պահին ընթանում է 5-րդ տեղում է։

«Արարատ» հոկեյի ակումբի տնօրեն Ռուբեն Ստեփանյանը լրագրողների հետ զրույցի ժամանակ նշեց, որ իրենց նպատակն է աշխարհին պատմել հայկական արմատներ ունեցող հոկեյի ակումբի մասին:

«Բոլորիս նպատակն էլ մեկն է. ուզում ենք, որ Հայաստանում հոկեյ մարզաձևը զարգանա, սակայն դա դժվար է պատկերացել միայն մեկ ակումբով: Մեր նպատակն է աշխարհին պատմել հայկական արմատներ ունեցող հոկեյի ակումբի մասին, և որ հոկեյ խաղում են իսկական հայերը։ Նպատակ ունենք «Արարատ» թիմը հանել միջազգային ասպարեզ, բայց դեռ չենք կարող ներկայացնել Հայաստանը, հանդես գալ Հայաստանի դրոշի ներքո և մասնակցել միջազգային մրցաշարերի, քանի որ թիմի խաղացողները  չունեն հայկական անձնագրեր։ Տղաները պատրաստ են ներկայացնել Հայաստանը, խաղալ Հայաստանի համար և բարձր պահել Հայաստանի անունը միջազգային մրցաշարերում, բայց անձնագրերի հարցը խոչընդոտում է մեր գործունեությանը»,- ասաց Ստեփանյանը:

«Արարատի» տնօրենը փաստեց, որ այդ առիթով դիմել են դեսպանատուն, քննարկել են այդ հարցը պաշտոնյա անձանց հետ: Ռուբեն Ստեփանյանն այս հարցով խոսել է նաև Յուրի Վարդանյանի հետ, երբ նա ՀՀ սպորտի և երիտասարդության հարցերի նախարարն էր:

«Յուրի Վարդանյանն ինձ ասաց, որ քաղաքացիության հետ կապված հարցելում զգույշ լինենք, քանի որ մտավախություն կա, որ ռուս և բելառուս հոկեյիստներին Հայաստանի քաղաքացիություն տալուց հետո կարող էին զորակոչել պարտադիր զինվորական ծառայության: Քննարկումների մեջ է այս խնդիրը: Նախընտրելի է, որ մեր մարզիկներին տան երկքաղաքացիություն, որպեսզի կարողանանք թիմին հայտավորել միջազգային մրցաշարերի։ Այսպես մենք հնարավորություն կունենանք հետագայում մասնակցել նաև օլիմպիական վարկանշային մրցաշարերի»,- նշեց Ստեփանյանը։

Տնօրենը նաև հույս հայտնեց, որ հայկական կողմը ևս հետաքրքրություն կցուցաբերի այս մարզաձևի զարգացման հարցում, քանի որ իրենց ֆինանսական բյուջեն այնքան մեծ չէ և իրենք ևս ունենք աջակցության կարիք: Ստեփանյանը նշեց, որ «Արարատում» հանդես եկող հոկեյիստների մեծ մասը ցանկանում է գալ Հայաստան, տեսնել սրբազան Արարատը, որի անվամբ թիմում իրենք հանդես են գալիս: