Ձեր վստահելի աղբյուրը

«Լայն սպառման ապրանքների շուկաներում մենաշնորհները դարձել են Հայաստանում ամենամեծ կոռուպցիոն չարիքը: Դրա պատճառով տուժում է մեր ամբողջ  բնակչությունը, թոշակառուները, սոցիալական անապահով վճակում գտնվող մարդիկ,  ովքեր ստիպված են սննդամթերքն արհեստականորեն ուռճացված գներով գնել»,-Ազգային ժողովի  նիստում ասաց ՀԱԿ խմբակցության ղեկավար Լևոն Զուրաբյանը:

Ըստ նրա, դրանից տուժում է բիզնեսը, որովհետև փակ է մրցակցության համար, նաև չհիմնավորված ծախսերի պատճառով: Լ. Զուրաբյանը նաև ասաց, որ նոր վարչապետը հայտարարում է, որ բոլորն այսուհետ առանց խոչընդոտների կարող են զբաղվել ներկրմամբ, «եթե խոչընդոտներ լինեն, առաջարկել է Պետրոս Ղազարյանին զանգահարել իր հեռախոսին և այդ մասին հայտնել»:

Ընդդիրմադիր պատգամավորի կարծիքով դա հարցի լուծում չէ, նա առաջարկեց Ազգային ժողովի նախագահ Գալուստ Սահակյանին   այս հարցը հասարակության ուշադրության կենտրոնում դնելու նպատակով հրավիրել ԱԺ լսումներ:

«Եկեք  այս հարցերն իսկապես դարձնենք լուրջ քննարկման առարկա: Կարևոր է, որ թափանցիկ քննարկենք, հասկանանք՝  ինչ է կատարվում մենաշնորհների ոլորտում, ինչ անհետաձգելի միջոցառումներ անցկացնենք, որպեսզի ապօրինի մենաշնորհները վերացվի: Կարծում եմ՝ հասարակությանը հուզող ամենակարևոր հարցերից է: Սրանից բոլորս կշահենք, եթե անցկացնենք լսումներ»,- ասաց Լևոն Զուրաբյանը:

Գալուստ Սահակյանը  նշեց, որ միշտ էլ կարող են անցկացնել լսումներ, բայց նախ և առաջ փաստեր են պետք:

«Առավել ևս եթե վարչապետն այդ մասին խոսել է, առաջիկայում իր բանաձևը կներկայացնի: Բավականին լուրջ և մեծ կառույց կա այդ գործով զբաղվող: Պետք է մի փոքր սպասել, տեսնել՝ կառավարությունն ինչ է անում, այդ իմաստով եթե դրա անհրաժեշտությունը լինի, հրավիրել նաև կառավարությանը»,- ասաց ԱԺ նախագահը:

ԲՀԿ խմբակցության  անդամ Միքայել Մելքումյանը տեղեկացրեց, որ ուրբաթ տեղի է ունեցել ԱԺ տնտեսական հարցերի մշտական հանձնաժողովի  նիստը, որտեղ քննարկվել է Տնտեսական մրցակցության  պաշտպանության պետական հանձնաժողովի 2017 թվականի ծրագիրը, առաջարկվել է կազմակերպել նախ լսումներ, այնուհետև նոր լսումների արդյունքներով  քննարկվի այն ԱԺ նիստում: