Ձեր վստահելի աղբյուրը

Եթե «Նաիրիտ»-ի վերագործարկման համար լինի նորմալ առաջարկ՝  հրավիրելով բոլոր շահագրգիռ  մարմիններին, շատ բաց, թափանցիկ խոսելու ենք: Դրա համար աշխատանքային խումբ պետք չէ, քանի որ ունենք կառավարություն, կան հստակ պատասխանատուներ,- Ազգային ժողովում կառավարության հետ հարցուպատասխանի ժամանակ հայտարարեց վարչապետ Կարեն Կարապետյանը՝ պատասխանելով  պատգամավոր Մհեր Շահգելդյանի հարցին՝ «Նաիրիտ»-ի վերագործակման և  դրա հետ կապված ծրագրերի, առհասարակ կառավարության ծրագրի արտադրական բլոկին վերաբերող հարցերի քննարկման համար աշխատանքային խմբեր ստեղծելու մասին:

Վարչապետը նշեց, որ ինչ-որ խմբեր, հանձնաժողովներ ստեղծելով՝ որևէ օգուտ չկա:

«Կլինի առաջարկ՝ մենք կպատասխանենք: Պատասխանը կլինի ոչ կոմպետենտ՝ մեզ քննադատեք»,- հավելեց Կարեն Կարապետյանը:

Կառավարության ղեկավարը նաև ասաց, որ «Նաիրիտ»-ի հետ կապված բոլոր ծրագրերը, որոնք կներկայացվեն կառավարությանը, իրենք հրապարակելու են կառավարության կայքում, որպեսզի յուրաքանչյուրը ծանոթանա: