Ձեր վստահելի աղբյուրը

«Հայաստանն ու աշխարհասփյուռ հայ ժողովուրդը մեծ ավանդ են ներդրել ոսկերչության և ակնագործության զարգացման գործում, իրենց հաստատուն տեղ ունեն այս ոլորտի տարեգրության մեջ»,-սյս մասին այսօր  Ոսկերիչների համաշխարհային կոնֆեդերացիայի (CIBJO) համաժողովի բացմանը հայտարարեց ՀՀ նախագահ Սերժ Սարգսյանը:

Նախագահի խոսքերով՝  հայ ոսկերիչների հաջողությամբ ստեղծած գործերը, նրանց գործունեությունը տարբեր երկրներում ոլորտին բերել է զարգացում:

«Նրանք հիմնել են ոսկերչական ձեռնարկություններ և վաճառատներ Նյու Յորքում և Փարիզում, Մոսկվայում և Լոնդոնում, Կոստանդնուպոլսում ու Բեյրութում, Կահիրեում և բազմաթիվ այլ երկրներում: Նրանց ձեռքով կերտվել են ոսկերչական արվեստի փայլուն նմուշներ, ադամանդակուռ գահեր ու թագեր, խաչեր ու շքանշաններ, շքեղ զարդանախշեր ու գավաթներ»,- նշեց Սերժ Սարգսյանը:

Ըստ նրա՝ այսօր Հայաստանում ոսկեգործության և ադամանդագործության զարգացման ուղղությամբ հետևողական աշխատանքներ են տարվում,  այդ ճյուղը հայտարարվել է երկրի տնտեսության գերակա, ռազմավարական ուղղություններից մեկը:

«Հայաստանում մի քանի տարի է, ինչ նշվոմ է ոսկերիչի ազգային օրը: Երևանում նույնիսկ ոսկերիչների փողոց կա, որը տանում է «Մերիդիան»  կենտրոն»,- ասել է նախագահը:

Նշենք, որ Երևանի  «Մերիդիան» ոսկերչական հատուկ տնտեսական գոտու տարածքում  անցկացվող Ոսկեգործների համաշխարհային համադաշնության համագումարին մասնակցում են 84 պատվիրակներ 25 երկրներից: