Ձեր վստահելի աղբյուրը

Հայաստանի ազատ ոճի ըմբշամարտի հավաքականի անդամ Լևան Բերիանիձեն մարզաձևի Հայաստանի առաջնությունում 125 կգ քաշային կարգում նվաճեց հանրապետության չեմպիոնի կոչումը:

Մարզիկը, ով ծնվել է Աբխազիայում, մեծացել Վրաստանում, իսկ 2015 թ.-ից Հայաստանի հավաքականի անդամ է, Panorama.am-ի հետ զրույցում նշեց, որ սպասում էր այս հաջողությանը, սակայն ցանկացած հաղթանակ պարգևում է նոր զգացողություններ ու անկրկնելի պահեր:

Panorama.am.- Լևան, շնորհավորում ենք հաղթանակի կապակցությամբ: Ինչպիսի՞ զգացողություններ ունես:

Լևան Բերիանիձե.- Շատ ուրախ եմ, թեև սպասում էի, որ կնվաճեմ Հայաստանի չեմպիոնի կոչումը: Յուրաքանչյուր մարզիկի համար մեծ ուրախություն է հաղթել ցանկացած մրցաշարում: Ես ևս բացառություն չեմ: Երջանիկ եմ և հիանալի զգացողություններ ունեմ:

Panorama.am.-Լևան, ո՞րն էր ամենադժվար գոտեմարտը:

Լևան Բերիանիձե.- Իհարկե, եզրափակիչ գոտեմարտը: Սակայն կարողացա դժվարին ու լարված պայքարում հաղթել Անդրանիկ Գալստյանին և նվաճել չեմպիոնի կոչումը: Յուրաքանչյուր տարի առաջնությունն ավելի ու ավելի ուժեղ է դառնում, սակայն, որպես կանոն, հաղթում է ուժեղագույնը:

Panorama.am.- Լևան, գլխավոր մարզիչ Արայիկ Բաղդադյանը նշել էր, որ առաջնությանը չմասնակցած ըմբիշները չեն ընդգրկվի հավաքականի կազմում: Դա ճի՞շտ որոշում է:

Լևան Բերիանիձե.- Իհարկե, ես համամիտ եմ գլխավոր մարզչի տեսակետի հետ: Եթե մենք բոլորս մասնակցում ենք Հայաստանի առաջնությանը, ինչո՞ւ պետք է մյուս մարզիկները բաց թողնեն այն, եթե, իհարկե, պատճառները հարգելի չեն: Մենք գալիս ենք, պայքարում, հաղթում և հավակնում ենք տեղ գտնել ընտրանու կազմում:

Panorama.am.- Առաջիկայում ի՞նչ ծրագրեր կան:

Լևան Բերիանիձե.- Դեռ հայտնի չէ: Իհարկե, կլինեն ուսումնամարզական հավաքներ, մարզումներ, սակայն այդ մասին կիմանանք ավելի ուշ: Այժմ իմ գլխավոր նպատակը լավ նախապատրաստվելն ու լավ մարզավիճակում լինելն է, որպեսզի հնարավորություն ստանամ մասնակցել դեկտեմբերին կայանալիք աշխարհի առաջնությանը և պատվով ներկայացնեմ Հայաստանը:

Panorama.am.- Ինչպե՞ս կգնահատես տարին:

Լևան Բերիանիձե.- Ինձ համար այն հաջող էր և հագեցած: Մասնակցեցի Օլիմպիական խաղերին: Ցավում եմ, որ մեդալ նվաճել չհաջողվեց: