Ձեր վստահելի աղբյուրը

Նաիրիտցիներն այսօր կառավարության շենքի դիմաց էին եկել  ոչ միայն գործարանի վերագործարկման պահանջով: Նրանց աշխատավարձերը կրկին սկսել են չվճարել, հոկտեմբերը ներառյալ նրանք չորս ամիս աշխատավարձ չեն ստացել:

Գործարանի Արհեստակացական կոմիտեի նախագահի խոսքով, 260 հոգի աշխատանքի է գալիս՝ հաշվապահ, անվտանգության աշխատակիցներ, պահականեր և այլն: Ճիշտ է գործարանը արտադրանք չի տալիս, բայց նրանք իրենց գործը անում են:

«Մինչև հիմա աշխատավարձը մեզ տվել են Որոտանի Կասկադի գումարներից, որոնք բանկում դրած են: Տոկոսները վերցրել, մեզ աշխատավարձ են տվել: Հիմա էդ աղբյուրը փակված է»,-կառավարության շենքի դիմաց հայտարարեց գործարանի Արհկոմի նախագահ Հրաչ Թադևոսյանը:

Կառավարության ներկայացուցիչները նաիրիտցիներին խնդրել են սպասել: Նրանք էլ ընդառաջել են:

«Վաղը և երկուշաբթի օրը՝ օրվա երկրորդ կեսին կգնանք նախարարի ու կամ աշխատակազմի մոտ, կիմանանք կատարած քայլերի մասին: Դրանից հետո մեր ծրագրած քայլերը կարգով կանենք, թե անկարգ կանենք, բոլորս միասին կորոշենք»,-ասաց նա:

Թադևոսյանը նշեց, որ իրենք համբերատար են, 70 օր սպասել են, 2 օր էլ կսպասեն:

«Նաիրիտի ապագան լավ է երևում, թունելի վերջում լույս է երևում»,-ասաց նա: