Ձեր վստահելի աղբյուրը

Հայաստանի ֆուտբոլի ազգային հավաքականի և «Մանչեսթեր Յունայթեդի» կիսապաշտպան Հենրիխ Մխիթարյանը շարունակում է չհայտնվել թիմի կազմում, ինչն անհանգստացնում է ինչպես հայ, այնպես էլ մանկունյանցիների երկրպագուներին: Բունդեսլիգայում անցկացրած ֆենոմենալ մրցաշրջանից հետո սպասվում էր, որ հայ ֆուտբոլիստի վերելքը կշարունակվի արդեն Մոուրինյոյի դարաշրջանում, սակայն մինչ այժմ վերելքի փոխարեն նկատվում է միայն անկում:

«Մանչեսթեր Յունայթեդ» տեղափոխվելուց հետո Մխիթարյանը հազվադեպ է հայտնվում թիմի մեկնարկային կազմում, նույնքան հազվադեպ էլ մտնում է փոխարինման, իսկ վերջին շրջանում նա չի հայտնվում նույնիսկ թիմի հայտացուցակում: Այդուհանդերձ, «Մանչեսթեր Յունայթեդի» երկրպագուները պահանջում են, որպեսզի Մոուրինյոն Մխիթարյանին խաղալու հնարավորություն ընձեռի, սակայն պորտուգալացի մասնագետն առանց տեսանելի պատճառների շարունակում է հայ ֆուտբոլիստին կազմից դուրս թողնել:

Թեև Հենրիխն ամբողջովին ապաքինվել է վնասվածքից, համենայն դեպս այդպես է ասվում ակումբում, այդուհանդերձ նա հայտավորված չէր ոչ Պրեմիեր լիգայի «Չելսիի» հետ դիմակայությանը, ոչ էլ երեկ կայացած Անգլիայի լիգայի գավաթի խաղարկության «Մանչեսթեր Սիթիի» հետ դիմակայությանը: Երկրպագուները չեն նահանջում և շարունակում են պահանջել Մխիթարյանին` վստահ լինելով, որ նա դեռ կկարողանա ցուցադրել իր ունակությունները խաղադաշտում:

Մանչեսթերյան դերբիից հետո մանկունյանցիների երկրպագուների համբերության բաժակը, ինչպես երևում է, լցվել է: «Isport»-ը ներկայացրել է համացանցում նրանց գրած մեկնաբանություններից մի քանիսը:

«18 ֆուտբոլիստների կազմում Մխիթարյանին չընդգրկելն ուղղակի ծիծաղելի է»:
«Մոուրինյոն ասում էր, որ Մխիթարյանն ապաքինվել է, սակայն նա հայտացուցակում չէ: Սկսում ենք անհանգստանալ»:
«Մխիթարյանի տրանսֆերը «Մանչեսթեր Յունայթեդ» ավելի անիմաստ է, քան նախորդ մրցաշրջանում Պատոյի տեղափոխությունը «Չելսի»: Այսպիսի տաղանդը պարզապես կկորչի»:
«Մխիթարյանի հետ կապված իրավիճակը վերահսկողությունից դուրս է եկել: Անտեսելով որոշ խնդիրներն այս ֆուտբոլիստի խաղի հետ կապված` անհավանական է, որ նա չի հայտնվում մեկնարկային կազմում»:
«Մոուրինյոն պետք է բացատրի, թե ինչ է կատարվում Մխիթարյանի հետ: Սա արդեն միայն ֆիզիկապես լավ մարզավիճակում չլինելու խնդիր չէ»:
«Եղեք համբերատար, սպասեք և կտեսնեք: Այսպես են մեզ ասում, բայց այդ շրջանն արդեն անցավ: Մխիթարյանի պարագայում ինչ-որ բան այն չէ և այս ամենը չափազանց տարօրինակ է»: