Ձեր վստահելի աղբյուրը

«Հոկտեմբերի 27-ը ծանրագույն հարված էր մեր պետականությանը և միանգամայն ուրիշ երկրում կապրեինք, եթե չլիներ հոկտմբերի 27-ը», -այսօր ԱԺ բակում հոկտեմբերի 27-ի զոհերի հուշակոթողի մոտ լրագրողների հետ ճեպազրույցում հայտարարեց ԱԺ պատգամավոր Ստեփան Դեմիրճյանը՝ 17 տարի առաջ այդ օրը զոհված ԱԺ նախագահ Կարեն Դեմիրճյանի որդին:

Դեմիրճյանի խոսքով, հոկտեմբերի 27-ի բացասական հետևանքները մինչ այժմ հաղթահարված չեն ու «զգացնել են տալիս»:

«Այդ ոճրագործությունը կատարվել է ներսի ստահակների կողմից: Ամեն ինչ արվեց ոճրագործությունը կոծկելու համար: Կարող ենք արձանագրել, որ ցանկություն չի եղել բացահայտելու, հակառակը», -հավելեց պատգամավորը:

Հարցին, թե այսօրվա իշխանությունները դեր ունե՞ն ոճրագործության չբացահայտման հարցում, Դեմիրճյանը պատասխանեց. «Հոկտեմբերի 27-ը առաջին հերթին վերաբերում է այն իշխանությանը, որի օրոք տեղի ունեցավ այդ ոճրագործությունը»:

Հիշեցնենք՝ 17 տարի առաջ, այս օրը՝ հոկտեմբերի 27-ին, մի խումբ ահաբեկիչներ՝ Նաիրի Հունանյանի գլխավորությամբ, թափանցեցին ՀՀ Ազգային ժողով, որտեղ տեղի էր ունենում Կառավարություն-ԱԺ հարցուպատասխանը և գնդակահարեցին գործադիր և օրենսդիր իշխանության առաջին դեմքերին։

Այդ օրը զոհվեցին ԱԺ նախագահ Կարեն Դեմիրճյանը, վարչապետ Վազգեն Սարգսյանը, Յուրի Բախշյանը, Հենրիկ Աբրահամյանը, Միքայել Քոթանյանը, Ռուբեն Միրոյանը, Արմենակ Արմենակյանը և Լեոնարդ Պետրոսյանը:

Այսօր  ՀՀ ԱԺ նախագահ Գալուստ Սահակյանը, ԱԺ փոխնախագահներ Էդուարդ Շարմազանովը  և Հերմինե Նաղդալյանը, ԱԺ պատգամավորները, զոհված գործիչների հարազատները, խորհրդարանի աշխատակազմի ներկայացուցիչները, խորհրդարանում հավատարմագրված լրագրողները ծաղիկներ են դրել ոճրագործության զոհերի հիշատակը հավերժացնող հուշակոթողին և լռությամբ ու խոնարհումով հարգել նրանց հիշատակը։