Ձեր վստահելի աղբյուրը

ՀՅԴ խմբակցության ղեկավար Արմեն Ռուստամյանն այսօր ԱԺ ճեպազրույցների ժամանակ  անդրադառնալով ԲՀԿ նախկին ղեկավար Գագիկ Ծառուկյանի՝ քաղաքականություն վերադառնալու հնարավորությանը, նշեց, որ պետք չէ բացառել, որ Ծառուկյանը կվերադառնա քաղաքականություն:

«Ես չեմ բացառում, որ նման բան կարող է կատարվել, հակառակը՝ շատ հավանական եմ համարում: Իսկապես, Հարվարդ պետք չէ ավարտել, որպեսզի հասկանալ, որ եթե դու չես զբաղվում քաղաքականությամբ, քաղաքականությունը միևնույն է զբաղվում է քեզնով, այն էլ այն ֆոնի վրա, երբ մենք գնում ենք փոփոխությունների, ու քաղաքական դաշտն ակտիվանում է: Տրամաբանորեն դա նշանակում է, որ մարդը չպետք է այդ ամենից այն կողմ դնի իրեն»,-  նշեց Արմեն Ռուստամյանը:

Նա նշեց, որ Գագիկ Ծառուկյանի հետ աշխատելու փորձ ունեն ու խնդիր չեն տեսնում: «Իր մոտեցումը, որ երկրում փոփոխություններ տեղի ունենան առանց արյան, դա ամենալավ մոտեցումն է: Քաղաքական այն տրամաբանությունը, որ ընթացքի մեջ է դրված Հայաստանում, շատերին է ստիպելու ակտիվանալ, քանի որ մի կողմ քաշվելը սխալ է, պետք է ամեն ինչ անել, որ երկրում սկսված պրոցեսներն արագ արդյունք տան, քանի որ մեր երկիրը դրա կարիքն ունի»,- ընդգծեց Արմեն  Ռուստամյանը:

Հարցին, թե քաղաքական դաշտն ունի՞ Գագիկ Ծառուկյանի կարիքը, ՀՅԴ խմբակցության ղեկավարը նշեց, որ նրա կարիքն ունի իր շրջապատը, այն մարդիկ, ում նա բարեգործությամբ փորձում է օգնել. «Եթե էջեր ծալելու, հետո չբացելու մասին է խոսքը, այդ ծալած էջերը մնում են Հարվարդում: Հայաստանում այնքան ծալած էջեր են բացվել, որ այդտեղ որևէ զարմանալի բան չկա, բազմիցս ծալված էջեր բացվել են»:

Դիտարկմանը, թե Ծառուկյանի՝ քաղաքականություն վերադառնալը համաձայնեցվա՞ծ է իշխանության հետ, Արմեն Ռուստամյանը նշեց, որ ՀՅԴ-ի հետ՝ որպես իշխանության մասի, համաձայնեցված չէ: «Ինչո՞ւ պետք է համաձայնեցվի, մարդն ազատ մարդ է, կարող է տնօրինել իր ճակատագիրն ինչպես ուզում է»,- ընդգծեց նա: