Ձեր վստահելի աղբյուրը

2016 թվականին ՏՏ ոլորտում համաշխարհային ներդրման համար ՀՀ նախագահի ամենամյա մրցանակին արժանացել է ֆրանսիացի գիտնական, դեյտագրամի գյուտարար, ինտերնետի և համացանցի նախահայրերից մեկը, Open-Root կազմակերպության գլխավոր տնօրեն Լուի Պուզանը: Հաղթողի անունը հայտարարվեց այսօր՝   ՀՀ Նախագահի նստավայրում ՏՏ ոլորտում համաշխարհային ներդրման համար ՀՀ Նախագահի 2016 թվականի մրցանակաբաշխության թեմայով հրավիրված ասուլիսի ժամանակ:

Միջազգային մրցանակաբաշխության կազմկոմիտեի նախագահ, ՀՀ նախագահի աշխատակազմի ղեկավար Արմեն Գևորգյանը նշեց, որ այս մրցանակաբաշխությունը դարձել է ոչ միայն կարևոր ավանդույթ ՏՏ ոլորտում, այլև՝  մեր կյանքի մի մասը, հատկապես այն մարդկանց համար, որոնք զբաղված են այս ոլորտում։

«Այս մրցանակաբաշխությունն արդեն իսկ նպաստում է ոչ միայն ոլորտի զարգացմանը, այլ նաև աշխարհով մեկ մեր երկրի և Հայաստանում ապրող մարդանց մասին անհրաժեշտ տեղեկության տարածմանը: Արդեն ունեցել ենք տարբեր երկրներից  6 մրցանակակիր։  Բացի նրանից, որ նրանք  էական նշանակություն են ունեցել իրենց խորհուրդներով ու ներդրումով, այլն նաև դարձել են Հայաստանի բարեկամները»,- նշեց Արմեն Գևորգյանը՝ հավելելով, որ նրանցից մի քանիսն իրենց սեփական նախաձեռնությամբ ու միջոցներով  աջակցում են Հայաստանի կրթական հաստատություններին, սեփական տեխնոլորգիաներով ու գիտելիքներով փորձում են հիմնել համապատասխան լաբորատորիաներ:

Մրցանակաբաշխության գործադիր խորհրդի նախագահ Հովիկ Մուսայելյանը նշեց, որ հպարտությամբ է նմանատիպ միջոցառումների մասնակցում:

«Յոթ տարի առաջ, երբ նախաձեռնում էինք այս մրցույթը,  շատերը թերահավատորեն էին վերաբերվում, չէին հավատում, որ այն իրականություն կդառնա: Մենք դա արեցինք և հպարտ եմ այն թիմով, որն այս ամենը նախաձեռնել և իրականություն է դարձրել, բացի այդ, այս մրցանակաբաշխությունով նաև մեր երկիրը ճանաչելի է դարձել աշխարհում»,- ասաց Հովիկ Մուսայելյանը:

Նրա խոսքերով՝  Լուի Պուզանը Հայաստան կժամանի նոյեմբերի 5-ին, հանդիպումներ կունենա ինչպես բարձրաստիճան պաշտոնյաների հետ, այնպես էլ ՏՏ ոլորտի ներկայացուցիչների, ուսանողների հետ:

Յոթերորդ տարին անընդմեջ ՎիվաՍել-ՄՏՍ-ը ստանձնում է մրցանակաբաշխության հովանավորությունը: ՎիվաՍել-ՄՏՍ-ի գլխավոր տնօրեն Ռալֆ Յիրիկյանը նշեց, որ իրենց ընկերության համար գաղափարախոսություն է այսպիսի ծրագրերի կողքին լինել։ «Մեր գաղափարախոսությունն այն է, որ  Հայաստանը ճանաչելի դարձնենք աշխարհում, երկրի անունը բարձր պահենք ՏՏ ոլորտում»,- ասաց Ռալֆ Յիրիկյանը:

Մրցանակաբաշխության հանձնաժողովի անդամ Թոնի Մորոյան էլ ասաց, որ   մրցանակաբաշխության հաղթողի համար շատ բարձր նշաձող են դրել: «Այս մրցանակաբաշխության հաղթողները կարող են նաև Նոբելյան մրցանակի արժանանալ»,- նշեց նա:

Ըստ նրա՝  հաղթողները տարբեր երկրներից են և հաղթողի համար պայման կա՝ այցելել Հայաստան:  «Նրանք մարդիկ են, որոնք իրենց գործունեությամբ փոխել են աշխարհը։ Ինձ համար պատիվ է լինել այս գործում, նախանձելի վիճակում ենք, այլ երկրներում նման նախաձեռնություններ չեն լինում»,- ասաց Թոնի Մորոյանը:

Նշենք, որ ՏՏ ոլորտում համաշխարհային ներդրման համար ՀՀ նախագահի ամենամյա մրցանակին 2010 թվականին արժանացել է «Ինտել» կորպորացիայի տնօրենների խորհրդի նախկին նախագահ Քրեյգ Բարրեթը: «Էփլ Քոմփյութեր» կորպորացիայի համահիմնադիր Սթիվ Վոզնյակը տեղեկատվական տեխնոլոգիաների ոլորտում համաշխարհային ներդրման համար ՀՀ Նախագահի մրցանակի երկրորդ մրցանակակիրն է: Մրցանակաբաշխության երրորդ մրցանակը ստացել է «Սինապտիկս» ընկերության պատվավոր նախագահ Ֆեդերիկո Ֆաջինը: Չորրորդ մրցանակին արժանացել է Կիսահաղորդիչային արդյունաբերության ասոցիացիայի նախագահ, կիսահաղորդիչային արդյունաբերության մասնագետների միության և «Թեքնո վիժն» ընկերության նախագահ, «Հիթաչի»-ի գլխավոր գործադիր տնօրեն Ցուգիո Մակիմոտոն: 2014-ին էլ ՀՀ նախագահի մրցանակին արժանացել է «Սիսկո» ընկերության զարգացման գծով նախագահ Մարիո Մացոլան, իսկ 2015-ին շնորհվել է «Կասպերսկու լաբորատորիայի» գործադիր տնօրեն Եվգենի Կասպերսկիին: