Ձեր վստահելի աղբյուրը

««Welcome to Armenia» զբոսաշրջային համաժողովի նպատակն է պատկան մարմինների օգնությամբ գնահատել Հայաստանի զբոսաշրջային ներուժը, հնարավորությունները, բացթողումներն ու անելիքները ոլորտի զարգացման համար»,-այսօր տեղի ունեցած համաժողովի ժամանակ իր խոսքում նշեց «Welcome to Armenia» ծրագրի համակարգող Վրույր Փենեսյանը:

Նրա խոսքով՝ պետք է ստեղծել «Տուրիզմի աջակցման խորհուրդ», որը կիրականացնի ոլորտին աջակցող գործառույթ և «Հայաստան» կատալոգը, որտեղ ներկայացված կլինեն մեկ երկրի բոլոր զբոսաշրջային վայրերը, հյուրանոցները և այլ ծառայությունները:

Նշենք, որ համաժողովում հիմնականում անդրադարձ եղավ մշակութային, սպորտային, էքստրեմալ, կրոնական տուրիզմին:

«Եկեղեցին իր այլևայլ խնդիրների հետ միասին լրջորեն մտածում է կրոնական տուրիզմի զարգացման մասին, իսկ դրանում մեծապես կարևոր է կրթության գործոնը: Համապատասխան կառույցների ուշադրությունը պիտի հրավիրել սրա վրա, քանի որ գործնականում հանդիպում ենք այնպիսի երևույթների, որոնք չպիտի տեղ ունենային մեր զբոսաշրջության մեջ: Եկեղեցու պատմության, եկեղեցական հուշարձանների հետ կապված ներկայացվող ինֆորմացիան երբեմն ընդունելի չէ և անգամ վտանգավոր է»,-ասաց միջոցառմանը ներկա Մայր Աթոռի ձեռագրատան, արխիվի և թանգարանների տնօրեն Տեր Ասողիկ քահանա Կարապետյանը:

Նա տեղեկացրեց, որ եկեղեցին այսօր համագործակցում է զբոսաշրջության ոլորտի մասնագետներ պատրաստող տարբեր հաստատությունների հետ, երբեմն իրենք էլ են հանդես գալիս մասնավոր դասընթացներով:

«Կրոնական տուրիզմի առումով մեր ունեցած պոտենցիալը լավագույնս չենք սպառում համարշարհային շուկայում: Բովանդակության առումով պակաս ունենք: Ուխտավորներին, զբոսաշրջիկներին ամեն մի վանքի, եկեղեցու համար մի ուրոյն ծրագիր պետք է ներկայացնել, որպեսզի այդ այցը նաև հոգևոր անդրադարձ ունենա նրանց վրա»,-ասաց Տեր Ասողիկ քահանա Կարապետյանը՝ հավելելով, որ իրենք բաց են զբոսաշրջային կազմակերպությունների հետ համագործակցության համար: