Ձեր վստահելի աղբյուրը

Երևանում տպարանի շենքի քանդման թույլտվությունը տրամադրվել է  Երևանի քաղաքապետարանի կողմից:

«Սեփականատիրոջ կողմից դիմում է եղել՝ տալ քանդման թույլտվություն: Քաղաքապետարանն իր լիազորությունների շրջանակում այս տարվա սեպտեմբերի վերջին տվել է քանդման թույլտվություն»,-Panorama.am-ի հետ զրույցում հայտնեց Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը:

Նրա խոսքով, շենքի պայթեցման եղանակով քանդման թույլտվության իրավասությունը Արտակարգ իրավիճակների նախարարության լիազորությունների շրջանակում է:

«Խնդրում եմ, այդ եղանակով քանդման վերաբերյալ բոլոր հարցերն ուղղել Արտակարգ իրավիճակների նախարարությանը, մենք նման թույլտվություն տրամադրելու իրավասություն ու լիազորություն չունենք: Մենք պայթեցում իրականացնող չենք»,-ասաց Գևորգյանը:

Արդեն գետնին հավասարված տպարանի տարածքի սեփականատերը նախագիծ է ներկայացրել, ըստ որի դրա տեղում կառուցվելու է  բազմաֆունկցիոնալ շինություն:

ԱԻՆ տեղեկատվության և հասարակայնության հետ կապերի  վարչության պատասխանատու Նանա Գնդոյանը Panorama.am-ի հետ զրույցում լրիվ հակառակ բանն ասաց՝ շենքի պայթեցման որոշում կայացնողը ԱԻՆ-ը չէ:

«Արտակարգ իրավիճակների նախարարությունը ընկերություններին տրամադրում է լիցենզիա, որ տվյալ ընկերությունն իրավունք ունի առհասարակ իրականացնել պայթեցման աշխատանքներ: ԱԻՆ-ը չի տալիս  տվյալ օրը տվյալ վայրում շենք պայթեցնելու թույլտվություն: Այսինքն, շենք պայթեցնելու վերաբերյալ որոշում ԱԻՆ-ը չի տրամադրում, և տվյալ դեպքում նույնպես նման որոշում չի տրամադրվել»,-ասաց նա:

ԱԻՆ-ից ընդգծեցին, որ տպարանի շենքի պայթեցման ժամանակ ԱԻՆ գործառույթը սահմանափակվել է միայն անվտանգության ապահովմամբ:

«Ինչպես գիտեք ԱԻՆ պաշտոնական տեղեկատվությունից,  տեղում անվտանգության կանոներից ելնելով հերթապահություն է իրականացրել մեկ մարտական հաշվարկ»,-ասաց Ն. Գնդոյանը:

Քաղաքապետարանի ներկայացուցիչն ավելացնում է. «Երեկ անձամբ եմ խոսել Նիկոլայ Գրիգորյանի հետ: Այդ մարդն ասել է, որ իրենք տվել են պայթեցման եղանակով քանդելու թույլտվություն: Բա հիմա ո՞նց ստացվեց, ինձ ուրիշ բան են ասում, ձեզ՝ ուրիշ բան»:

Ի դեպ, Արթուր Գևորգյանը հայտնեց, որ տպարանի շենքը ներկա սեփականտիրոջը վաճառվել է դեռ 2009 թվականից առաջ, երբ Երևանը համայնք չէր:

«Հետևաբար, շենքի վերաբերյալ ինֆորմացիա կարող է տրամադրել կադաստրի կոմիտեն»,-ասաց Գևորգյանը:

Ոստիկանությունից հայտնեցին, որ շենքի պայթեցման վերաբերյալ ահազանգ չեն ստացել:

Հիշեցնենք, որ նման «ձևով» քանդվել էր Աբաս միրզայի մզկիթի պատը:  Սկզբում շինարարները քանդել էին իսկականը, հետո մի այլ պատի անունը դրել էին «մզկիթի պատ», որ ազգամիջյան աղմուկ չբարձրանա: Դե՝  իսկ այդ կեղծ մզկիթը քանդելն արդեն ոչ մի հետևանք չունեցավ: