Ձեր վստահելի աղբյուրը

Տեղեկատվական տեխնոլոգիաների ոլորտի զարգացման համար մշակվում է նոր ռազմավարություն, որի նպատակն է ոլորտը դարձնել տնտեսական զարգացման հիմնական ուղղությունը: Այս մասին այսօր լրագրողների հետ հանդիպման ժամանակ ասաց Ինֆորմացիոն տեխնոլոգիաների ձեռնարկությունների միության փոխտնօրեն Հայկ Չոբանյանը:

Նրա խոսերով՝ առաջիկա հինգ տարիների ռազմավարության նախագծի հիմնական ուղղություններն են Հայաստանի բարձր տեխնոլոգիական ապրանքանիշի ստեղծումն ու զարգացումը, կրթության որակի արմատական փոփոխությունը և աշխատուժի բարելավումն ու ձեռներեցության զարգացումը:

«Ռազմավարության ուղենիշերից մեկը՝ հայկական ՏՏ բրենդի առաջխաղացումն այսօր կրիտիկական խնդիր է աշխարհը գրավելու համար: Այլևս աշխարհը ոչ թե գրավում են ընկերությունները, այլ՝  երկրները»,- ասաց Հայկ Չոբանյանը:

Դրա համար, ըստ նրա, կարևոր են այն կրթական ծրագրերը, որոնք Հայաստանում  իրականացվում է: «Մեր երկրի  տեխնոլոգիական առաջխաղացման համար այդ ծրագրերը կարող են ամենամեծ ազդեցությունն ունենալ: Դրանք ներդրվելու են դպրողներում: Մենք այս ծրագրերի շնորհիվ հնարավորություն կունենանք դպրոցական տարիքից բացահայտել տաղանդներին: Ամեն անկյունում թաքնված այդպիսի երեխա կա»,- նշեց նա:

Երկրորդ դրույթը ձեռներեցության զարգացումն է: Հայկ Չոբանյանի խոսքերով՝ Հայաստանում պետք է բարձրանա ձեռներեցի ստատուսը, ձեռներեցը պետք է լինի առաջին տեղում, քանի որ ինքն է ստեղծում երկրի արժեքը. «Երբ մենք կարողանանք այս մշակութային հեղաշրջումը կատարել, արդյունքում կստեղծվեն այնպիսի ընկերություններ, որոնք երկրին մեծ օգուտներ կբերեն»:

Անդրադառնալով ռազմավարության մյուս կարևոր դրույթին՝ կրթական բաղադրիչին, Հայկ Չոբանյանն ասաց, որ կրթական համակարգում արմատական փոփոխություններ են հարկավոր:

« Մենք ունենք 2000-ից ավելի որակյալ մասնագետի կարիք:  Այսօր բուհերն ունենում են տարեկան  1800 շրջանավարտ, մինչդեռ, նրանցից 900-ն են ի վիճակի աշխատել ոլորտում: Սա խղճուկ վիճակ է, պահանջարկի ու առաջարկի տարբերությունը հսկայական է և ամեն տարի այդ տարբերությունը մեծանում է: Դրան զուգահեռ, երիտասարդության շրջանում գործազրկությունը մեծ թիվ է կազմում: Դրա համար պետք է բարձրացնել կրթության որակը և խթանել ցանկացած նախաձեռնություն»,- ընդգծեց Հայկ Չոբանյանը:
 
Ինֆորմացիոն տեխնոլոգիաների ձեռնարկությունների միության փոխտնօրենի խոսքերով՝ ներկայումս ՏՏ ոլորտի 20-25 % աճը բավարար չէ, առանց որևէ միջամտության էլ այդ աճը կապահովվեր: ՏՏ ոլորտի առաջխաղացման համար, ըստ նրա,  պետությունը պարտադիր մասնակցություն պետք է ունենա: 

Հիշեցնենք, որ այսօր Հայկ Չոբանյանը հայտարարել է՝ ՀՀ կառավարության նոր ծրագրում ինֆորմացիոն տեխնոլոգիաների ոլորտը գրեթե առկա չէ: