Ձեր վստահելի աղբյուրը

«Ես հավատում եմ, որ 3,2 տոկոս տնտեսական աճը իրատեսական է, և մենք կարող ենք այն կյանքի կոչել», -այսօր Ազգային ժողովում լրագրողների հետ ճեպազրույցում հայտարարեց Ֆինանսների նախարար Վարդան Արամյանը՝ պատասախնելով հարցերին:

Նախարարի խոսքով,  Արժույթի միջազգային հիմնադրամի (IMF/World Economic Outlook) ցուցանիշների համաձայն, 2016 թվականի տնտեսական աճը 3 տոկոս է կազմելու:

«Տնտեսական աճի ցուցանիշների վերաբերյալ իրենց ակնկալիքներն ու պատկերացումները չեն տարբերվում մեր ակնկալիքներից ու պատկերացումներից», -նկատեց նախարարը:

Հարցին, թե բյուջեի նախագծով չի սպասվում թոշակների ու աշխատավարձերի բարձրացում արդյոք դա հիասթափություն չի՞ առաջացնի հասարակության շրջանում, Արամյանը հակադարձեց՝ պատասխանելով, որ ավելի հիասթափեցնող կլիներ, եթե ինքը սուտ խոսեր:

«Իսկ ճշմարտությունը հետևյալն է՝ հանրության հետ պետք է հաղորդակցվել ճիշտ, պետք է հանրության համար ազնիվ լինել ու հանրության համար ապահովել կայուն տնտեսական միջավայր: Չի լինում բացարձակություն, պետք է ինչ-որ մի բանի հաշվին, ինչ-որ մի բան ունենաս: Դա ընդունված կանոն է: Ես օրինակ, զոհաբերել եմ թոշակների ու աշխատավարձերի ապագա բարձրացումը: Դա կարող էի կարճաժամկետ անել, բայց հետագայում իրենց առջև ես արդար չէի լինի, որովհետև եթե մյուս տարի կամ հաջորդ տարիներին ես վտանգեմ տնտեսական աճը…իսկ տնտեսական աճն է ինձ հնարավորություն տալիս, որպեսզի ես պերմանենտ իրենց աշխատավարձերն ու թոշակները բարձրացնեմ: Մեկ տարվա  խնդիր լուծելով և վտանգելկով երկարաժամկետ խնդիրը, կարծում եմ ազնիվ չէ», -նկատեց Արամյանը: