Ձեր վստահելի աղբյուրը

Ենթադրյալ կաշառք վերցնելու համար մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանը կալանավորվել է: Այդ մասին Panorama.am-ին տեղեկացրեց նրա փաստավաբ Վարդուհի Էլբակյանը:

«Կալանավորելու մասին միջնորդություն նախաքննություն իրականացնող մարմինը ներկայացրել էր դատարան հոկտեմբերի 29-ին, և դատարանը բավարարել է միջնորդությունը», -փոխանցեց տիկին Էլբակյանը:

Դատավորի նկատմամբ մեղադրանքն առաջադրվել է ՀՀ Քրեական օրենսգրքի 311-րդ հոդվածի 4-րդ մասի 3-րդ կետով` (դատավորի կողմից խոշոր չափով կաշառք ստանալը):

Փաստաբանը դեռևս հստակ չէր որոշել՝ կբողոքարկե՞ն կալանքի մասին որոշումը, թե՞ ոչ և այդ մասին հարցին ի պատասխան ասաց. «Ամենայն հավանականությամբ կբողոքարկենք»:

Ավելի վաղ ԱԱԾ-ն տեղեկություն էր տարածել, որի համաձայն, Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանը քաղաքացիական գործով կողմի օգտին որոշում կայացնելու համար պահանջել և երևանյան գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո: Այդ ամենը ներկայացնող տեսանյութ էր ԱԱԾ-ն հրապարակել: Քրեական գործն ուղարկվել էր Գլխավոր դատախազություն, որտեղից էլ՝ ՀՔԾ։

Ավելի ուշ Հատուկ քննչական ծառայությունը տեղեկացրեց, որ դեպքի առթիվ ՀՀ քրեական օրենսգրքի 311-րդ հոդվածի 4-րդ մասի 3-րդ կետով` (դատավորի կողմից խոշոր չափով կաշառք ստանալը) հարուցվել է քրեական գործ: Եվ դրանից հետո միայն Գլխավոր դատախազությունը ԱԽ-ին միջնորդել էր այս գործով մեղադրյալ ներգրավել ու կալանավորել նրան։ Արդարադատության խորհուրդը որոշել էր բավարարել դատախազության միջնորդությունը: