Ձեր վստահելի աղբյուրը

«Ճարտարապետների միությունում տպարանի շենքի պայթեցման վերաբերյալ քննարկում չի եղել, ինչպես պնդել է շենքի սեփականատերը»,-այսօր լրագրողների հետ հանդիպմանը հայտարարեց Ճարտարապետների միության նախագահ Մկրտիչ Մինասյանը:

«Նման քննարկում պետք է կազմակերպվեր նոյեմբերի 1-ին, բայց չգիտենք՝ վերացնելուց հետո ի՞նչ պետք է քննարկենք: Այս այս վիճակին հասել ենք այն պատճառով, որ պատմամշակութային հուշարձանների ցանկում ոչ թե պետք է ներառվեն հատ-հատ շենքեր, այլ թաղամասեր: Այն հուշարձանները, որոնք պատմամշակութային հուշարձանների ցանկում չեն, դրանց շատ վատ սեփականաշնորհում է կատարվում: Չնչին գումարով շենքերը սեփականաշնորհվում են և սեփականատերերն էլ շենքերն այս վիճակի են հասցնում»,-ասաց ճարտարապետը:

Ինչ վերաբերում է շենքը քանդելու ձևին՝  Մինասյանն ասաց, որ այն և վտանգավոր էր, և արհամարհական:

«Տպարանի շենքը ամուր շենք էր: Չեմ հասկանում՝ ի՞նչ պետք անել, որ այս արհավիրքը կանգնեցվի: Ո՞վ է սեփականատերը, ո՞նց պատահեց, որ քանդվեց այս ճանապարհով, նախօրոք չհայտարարեցին դրա մասին, որ հանկարծ ակտիվիստները, լրագրողները չգնան, ահազանգեն: Որոշեցին, որ գողի պես պիտի անեն: Սա բարբարոսություն, գողություն, նսեմություն, նենգություն է: Այս ամենի պատճառն այն է, որ այս քաղաքը չեն սիրում: Հիշողություն են ջնջում: Սրանք լկտիության վերջին ձևերն են: Պրոֆեսիոնալներն անտեսված են: Այսօրվա Երևանի ճարտարապետությունն արվարձանային ճարտարապետություն է»,-մտահոգություն հայտնեց կինոռեժիսոր Հրանտ Վարդանյանը:

Կինռեժիսորի խոսքով՝  բոլոր ժամանակներում էլ ճարտարապետները կռվով են ինչ-որ բաներ փորձել պաշտոնյաներին հասկացնել, բայց այժմ ավելի բարդ ժամանակներ են, պրոֆեսոնալներն այսօր անտեսված են:

«Վաղը մեկը կարող է գալ հայտարարել, որ ուզում են «Ռոսիա» կինոթատրոնը քանդել  կամ Հանրապետության հրապարակի մեջտեղում բիոզուգարան կառուցել: Այս ինչ արհամարհանք է ժողովրդի, պետության, պետականության, առավել ևս պրոֆեսիոնալիզմի նկատմամբ»,-ասաց հանդիպմանը ներկա քանդակագործ Ֆերդինանդ Առաքելյանը:

Անդրադառնալով մշակույթի նախարար Արմեն Ամիրյանի հայտարարությանը, թե տպարանի շենքը «այդքան էլ արքեքավոր չէր»  քանդակագործն ասաց. «Էդ ի՞նքն էր գնահատում այդ արժեքավորը, ինքը դեռ փոքր է, որ շենքերի արժեքավորությունը գնահատի: Այ քեզ բան: Ինքն էլ նոր նախարար է, թող իր չափը չանցնի, մենք գիտենք չափը»: