Ձեր վստահելի աղբյուրը

ՀՀ կառավարության նոր ծրագրում ինֆորմացիոն տեխնոլոգիաների ոլորտը գրեթե առկա չէ: Այս մասին այսօր լրագրողների  հետ հանդիպման ժամանակ ասաց Ինֆորմացիոն տեխնոլոգիաների ձեռնարկությունների միության փոխտնօրեն Հայկ Չոբանյանն՝ անդրադառնալով  կառավարության ծրագրում ՏՏ ոլորտում սպասվող բարեփոխումներին:

Ըստ նրա՝  իրենք չեն մասնակցել այդ փաստաթղթի ձևավորմանը, մինչդեռ ՏՏ ոլորտի հիմնական ուղղությունները պետք է ձևակերպված լինեին կառավարության ծրագրում:

«Ճիշտ չեմ համարում այս տեսքով փաստաթղթի հրապարակումը»,-նշեց նա:

Ծրագրում, ըստ նրա, կան 10 կետեր, որոնք վերաբերում են միայն էլեկտրոնային կառավարմանը:

«Կառավարության այս գործողությունների ծրագրում ընդհանրապես  արտացոլված չեն այն ռազմավարական  ուղղությունները, որոնք պետք են ինֆորմացիոն տեխնոլոգիաների զարգացման համար: Դա նշանակում է, որ մենք ունենք համակարգային խնդիրներ»,- նշեց Հայկ Չոբանյանը՝ հավելելով, որ կառավարության ծրագրում բացակայում է ոլորտի ռազմավարությունը, որն ապահովում է երկրի քաղաքականության ուղենիշը և կայուն ընթացքը:

Մինչդեռ, ըստ նրա,  ինֆորմացիոն տեխնոլոգիաների ոլորտի զարգացումը Հայաստանում այլընտրանք չունի:

Հայկ Չոբանյանը նշեց, որ ՏՏ ոլորտի զարգացումն այնպիսի մակարդակում է Հայաստանում, որ առանց ազգային ծրագիր ունենալու կամ առանց պետական մասնակցության հնարավոր չէ հաջողություն ունենալ: «Երբ 2000-ականներին տեխնոլոգիական ոլորտը նոր էր զարգանում, պետությունը կարող էր ակտիվ մասնակցություն չունենալ և դա շատ ցավալի չէր լինի ոլորտի համար, իսկ այսօր այլընտրանք չկա:  Պետությունը պարտավոր է լինել հիմնական դերակատարներից մեկը, քանի որ այսօր մրցակցությունը ոչ թե Հայաստանի ներսում է, այլ Հայաստանից դուրս, ոչ միայն արդյունաբերություններ են մրցակցում իրար հետ, այլև՝ երկրները»,- ասաց Հայկ Չոբանյանը:

Ինֆորմացիոն տեխնոլոգիաների ձեռնարկությունների միության փոխտնօրենի խոսքերով՝  25 տարի առաջ Հայաստանի գիտահետազոտական և տեխնոլոգիական ճյուղերում աշխատում էին 100-150 հազար ինժեներներ: Այսօր այդ ոլորտում ներգրավված է 15 հազար մասնագետ:

«Պոտենցիալի և այսօրվա առկա իրականության տարբերությունը 10 անգամ է: Դա նշանակում է, որ եթե պետական մակարդակով ուշադրություն դարձվի ոլորտին, ապա  բարձր աշխատավարձով աշխատող մարդականց թիվը 10 անգամ կաճի»,- նշեց նա՝ հավելելով, որ ՏՏ ոլորտում միջին աշխատավարձը կազմում է 1700-1800 ԱՄՆ դոլար:

Հայկ Չոբանյանի խոսքերով՝  Հայաստանը պետք է ունենա ինֆորմացիոն տեխնոլոգիաների ոլորտում հավակնոտ և հզոր ռազմավարություն, որը պետք է դրված լինի ցանկացած կառավարության ծրագրում: Մինչդեռ, ըստ նրա, այդ ռազմավարության բացակայությունը բերում է այնպիսի ծրագրերի, որն այսօր ունենք:

«Հասկանում ենք, որ Կառավարության ծրագիրը կարճաժամկետ է, բայց ծրագիրը հիմք է հաջորդ կառավարության համար: Դրա համար սկսել ենք մշակել ՏՏ ոլորտի նոր ռազմավարությունը, որը նախատեսված է առաջիկա 4-5 տարիների համար, քանի որ առանց այդ տեսլականի չենք կարող այնպիսի գործողություններ սկսել, որը կարող է հաջողություն բերել մեր երկրին»,- ընդգծեց Հայկ Չոբանյանը: