Ձեր վստահելի աղբյուրը

«Ես կարծում եմ, որ դուք պետք է փորձեք Լևոն Զուրաբյանից ճշտել, թե ինչ է նա նկատի ունեցել և ով է նման բան ասել: Ես փորձել եմ պարզել, հիմա էլ դու փորձեք»,-Ազգային ժողովում լրագրողների հետ զրույցում ասաց ՀՀ կառավարության աշխատակազմի ղեկավար-նախարար Դավիթ Հարությունյանը՝ պատասխանելով հարցին, թե ՀԱԿ խմբակցության ղեկավար Լևոն Զուրաբյանն ահազանգել է, որ  ՀՀԿ շրջանակում  խոսակցություններ կան, թե ընտրատեղամասերում հնարավոր է  տեսախցիկներ չտեղադրվեն, ի՞նչ խնդիր կա:

Դ. Հարությունյանի խոսքով՝ տեսախցիկների հարցում տեխնիկական խնդիրներ չեն կարող առաջանալ, միակ խնդիրը կարող է լինել այն, որ գումարները չբավարարեն և այդ պատճատով որևէ կազմակերպություն հանձ չառնի կատարելու այդ աշխատանքը:

Կառավարության աշխատակազմի ղեկավար-նախարարը հայտնեց, որ այս պահին տեսախցիկների տեղադրման հարցով որևէ կազմակերպության հետ բանակցություններ չեն ընթանում. «Լինելու է գնման բաց ընթացակարգ, և ցանկացած կազմակերպություն, որը կբավարարի այն որակական պահանջներին, որոնք կսահմանի եռակողմ հանձնաժողովը, կկարողանա մասնակցել: Մենք առաջին իսկ օրվանից շեշտել ենք, որ պատասխանատվությունը չի լինելու միայն կառավարության ուսերին: Լինելու է եռակողմ հանձնաժողով, որտեղ կառավարությունը կլինի փոքրամասնություն: Թե որ կազմակերպությունը կիրականացնի այդ աշխատանքը, կորոշի հանձնաժողովը»: