Ձեր վստահելի աղբյուրը

Սարի թաղի բռնությունների դեպքով քրեական գործի նախաքննությունը շարունակվում է, և նախնական քննության տվյալները կարող են հրապարակվել բացառապես վարույթն իրականացնող քննիչի թույլտվությամբ: Այս մասին խորհրդարանում լրագրողների հետ զրույցում ասաց Հատուկ քննչական ծառայության պետի տեղակալ Վլադիմիր Հովհաննիսյանը:

«Դրա համար ես ձեռնպահ կմնամ հիմա կոնկրետ տվյալներ հայտնելուց: Հավաստիացնում եմ, որ գործով ձեռարկվում են անհրաժեշտ հնարավոր բոլոր քննչական, օպերատիվ հետախուզական միջոցառումները՝ կատարված հանցագործությունները լիարժեք բացահայտելու, դրանք կատարած անձանց շրջանակը լիարժեք պարզելու և քրեական հետապնդում իրականացնելու ուղղությամբ»,-ասաց ՀԾՔ պետի տեղակալը:

Լրագրողի հարցին, թե նորմա՞լ է, որ ՀՔԾ-ն տեղեկություն է հրապարակում այն մասին, որ ՊՊԾ գնդի գրավման ժամանակ ոստիկանների մահվան մեջ մեղավոր անձինք բացահայտվել են, բայց անուններ չեն հրապարակվում, Վլադիմիր Հովհաննիսյանը պատասխանեց. «Դարձյալ կրկնեմ, հրապարակման նյութի շրջանակը որոշում է կոնկրետ քննիչը: Եթե վարույթն իրականացնող քննիչը որոշել է, որ այս ծավալի տեղեկություն պետք է տրամադրի, դա բխում է օրենքի պահանջից»:

Նա նշեց, որ Սարի թաղի դեպքերի հետ կապված մեղադրական եզրակացությամբ` յոթ անձի վերաբերյալ գործեր են անջատվել և ուղարկվել դատարան, դրանցից 4 չորս կամ հինգը կալանավորված են, և նախաքննությունը շարունակվում է:

Հարցին, թե  ոստիկաններին այդ օրը հրահանգ տվող բարձրաստիճան ոստիկաններ կանչվե՞լ են հարցաքննության, Վլադիմիր Հովհաննսիսյանը պատասխանեց. «Չեմ կարող ասել, նախաքննությունը շարունակվում է, այդ տվյալները կարող է հրապարակել միայն քննիչը, եթե թույլատրելի կհամարի»:

ՀՔԾ պետի տեղակալը համաձայն չէ նաև այն դիտարկումների հետ, որ ընդհանրապես բարձրաստիճան պաշտոնյաները պատժի չեն ենթարկվում: «Եթե հետևեք մեր լրատվական կայքին, ապա կտեսնեք, որ բազմաթիվ գործեր են քննվել, որոնցով բարձրաստիճան պաշտոնատար անձինք են ենթարկվել քրեական պատասխանատվության»,- ասաց նա՝ միաժամանակ հավելելով, որ հիմա չի կարող նրանց անունները հիշել: