Ձեր վստահելի աղբյուրը

«Սյունիքում բարոյահոգեբանական մթնոլորտը գերազանց վիճակում  է»,- այս մասին այսօր Ազգային ժողովում լրագրողների հետ զրույցում ասաց Սյունիքի մարզպետ Վահե Հակոբյանը՝ հավելելով, որ մարզում բացարձակ ծանր մթնոլորտ այսօր չկա, նորմալ աշխատանքային մթնոլորտ  է տիրում:

Հարցին, թե արդյոք կադրային ջարդ չի՞ եղել, մարզպետը նշեց, որ մարզպետարանի աշխատակիցների  90 տոկոսն այսօր շարունակում է աշխատել: «Արդեն փոփոխվել են և կփոփոխվեն այն անձնավորությունները, որոնք իմ կարծիքով՝ ոչ իրենց տեղում են և ոչ մասնագետ են»:

Ինչ վերաբերում է նախկին մարզպետ Սուրիկ Խաչատրյանի օգնական Զարզանդ Նիկողոսյանի ազատմանը, Վահե Հակոբյանն ասաց, որ Զ. Նիկողոսյանն ազատվել է «իր դիմումի համաձայն»: Վ. Հակոբյանը նաև նշեց, որ ինքը նախկին մարզպետ Սուրիկ Խաչատրյանի հետ հանդիպել  ու զրուցել է:

Անդրադրադառնալով մարզում իրականացվելիք ծրագրերին՝ Սյունիքի մարզպետն ասաց, որ շուտով կհիմնվի Սյունիքի զարգացման և ներդրումների հիմնադրամ, որը կառավարության որոշմամբ, կաշխատի մարզպետարանի հետ և կփորձի բոլոր դեֆիցիտները փակել:

«Դա և գյուղատնտեսությանն է վերաբերում, և կրթօջախներին, և առողջապահությանը»,- ասաց նա:

Հարցին` ինչպե՞ս է պատրաստվում է ՀՀԿ-ի իշխանությունը մարզում պահպանել, քանի որ Սուրիկ Խաչատրյանը երկրորդ անգամ վերանշանակվեց հատկապես հենց այդ նպատակով, մարզպետը պատասխանեց. «Ես անկուսակցական եմ, և իմ առջև նմանատիպ խնդիր դրված չէ»:

Դիտարկմանը, թե՝  Դուք նշանակվել եք ՀՀԿ-ի կողմից,  Վահե Հակոբյանը նշեց. «Ես նշանակվել եմ վարչապետի առաջարկով»: