Ձեր վստահելի աղբյուրը

Շենգավիթ վարչական շրջանի ընդհանուր իրավասության դատարանում ծննդկան Մերի Մարգարյանի մահվան գործով դատական նիստն այսօր հետաքրքիր զարգացում ստացավ:

Մասնավորապես, ցուցմունքներից պարզ դարձավ, որ 3-րդ կարգի բժշկական կենտրոնը չի ունեցել անհրաժեշտ սարքավորումներ, ծանր վիճակում գտնվող հղիին հետազոտելու համար սարքավորումը չի աշխատել, իսկ նրան զննելու համար նեղ մասնագետն հրավիրվել է այլ բժշկական կենտրոնից:

Հիշեցնենք՝  34.5 շաբաթական հղիություն ունեցող Մերի Մարգարյանը 2015-ի հուլիսի 23-ին դժգոհել էր բարձր ջերմությունից ու թուլությունից, սակայն նրան հսկող «Շենգավիթ» բժշկական կենտրոնի մանկաբարձ-գինեկոլոգ Շուշանիկ Բախշյանը հորդորել էր խմել պարացետամոլ: Մերիի բարձր ջերմությունը շարունակվել է մինչև հուլիսի 26-ը և հենց այդ օրն էլ որոշվել է նրան հոսպիտալացնել:

Շարունակվող ջերմությամբ ծանր վիճակում գտնվող Մերիին հուլիսի 28-ին տեղափոխել են Էրեբունի բժշկական կենտրոն, որտեղ կատարվել է կեսարյան հատում: Նա մահացել է, նրանից մեկ օր անց՝  երեխան:

Այս գործով, հիշեցնենք, ամբաստանյալներ են «Շենգավիթ» բժշկական կենտրոնի մանկաբարձ-գինեկոլոգներ Շուշանիկ Բախշյանն ու Անի Բաբելյանը, որոնք մեղադրվում են հղի Մերի Մարգարյանին ոչ պատշաճ բուժօգնություն ցուցաբերելու համար (ՀՀ Քրեական օրենսգիրք 130-րդ հոդվածի 2-րդ մաս):

Այսօր դատարանում ցուցմունքներ տվեցին «Շենգավիթ» բժշկական կենտրոնի բժիշկներ ռադիոլոգ Զարուհի Հարությունյանը, անեսթեզեոլոգիայի և ինտենսիվ թերապիայի բաժանմունքի վարիչ Աշոտ Ամրոյանը և բժշկական կենտրոնի մանկաբարձության գծով փոխտնօրեն Աշոտ Սիրունյանը:

Հետաքրքրականը, նկատենք, Աշոտ Սիրունյանի ցուցմունքն էր:

Մինչ այդ ռադիոլոգ Հարությունյանն ասաց, որ ռենտգեն հետազոտության է ենթարկել 35,4 շաբաթական հղիություն ունեցող Մերիին, և նրա թոքերում որևէ խնդիր չի հայտնաբերվել:  Տուժող կողմի և դատավոր Դավիթ Բալայանի հարցերին տված պատասխաններից պարզվեց, որ սարքավորումը, որով հետազոտվել է Մերի Մարգարյանը, սարքին չի եղել:

Տուժող կողմի ներկայացուցիչ, փաստաբան Մարինե Թովմասյանը հետաքրքրվեց, թե հնարավո՞ր է Մերիի թոքերում մի երևույթ եղել է, որ այդ սարքավորումը ցույց տված չլինի, բժիշկն ասաց, որ հնարավոր չէր:

Տուժող կողմը դարձյալ հետաքրքրվեց, թե հնարավո՞ր է, որ հետազոտությունը ցույց տա, թե Մերիի թոքերում որևէ խնդիր չկա, բայց մի քանի ժամ հետո նրա թոքերում այտուց լինի, բժիշկ Հարությունյանը պատասխանեց. «Նայած  ինչ է հայտնաբերվել»:

Դատավորը հետաքրքրվեց, թե ինչո՞ւ սարքավորումը չի աշխատել, բժիշկը պատասխանեց, որ այդ անսարքությունը ինքը նկատել է հենց այդ օրը:

Մյուսը անեսթեզեոլոգիայի և ինտենսիվ թերապիայի բաժանմունքի վարիչ Աշոտ Ամրոյանն էր, որն ասաց, որ Մերիին ինքը զննել է Շուշանիկ Բախշյանի խնդրանքով՝ հուլիսի 27-ի մեկ առավոտյան և մեկ էլ կեսօրին:

«Շուշանիկ Բախշյանն ինձ ասաց, որ հղիի մոտ երիկամների բոբոքում կա, ինչի հետևանքով Մերիի մոտ մենք նկատեցինք գիտակցության խանգարում, հարցերին պատասխանում էր ուշ, կողմնորոշման խնդիր ուներ: Այդ պատճառով էլ մենք հրավիրեցինք նեղ մասնագետի՝ նյարդաբանի», -ասաց Ամրոյանը՝  նկատելով, որ հետազոտության արդյունքներով լյարդի ֆերմենտները բարձր են եղել, ինչը կարող էր հանգեցնել ոչ ադեկվատ վիճակի:

Ամրոյանը ասաց նաև, որ բուժկենտրոնում նյարդաբանի հետ միասին կազմակերպվել է բժիշկների նեղ կոնսիլիում, որտեղ քննարկվել է Մերի Մարգարյանի վիճակը և բժիշկների մոտ առաջացել է ենթադրություն, որ Մերիի մոտ հնարավոր է արյան զեղում և նրան պետք է ուղարկել բազմապրոֆիլ հիվանդանոց: Այս բժշկի խոսքով, Մերիին կեսարյան հատում անելու մասին հարցը չի քննարկվել:

«Աշոտ Սիրունյանը հետաքրքրվեց՝  եթե արյան զեղում լինի, մենք կարո՞ղ ենք կեսարյան հատում անել, ես պատասխանել եմ՝ ավելի ճիշտ կլինի հիվանդին տեղափոխել բազմապրոֆիլ հիվանդանոց, որտեղ հնարավոր բոլոր սարքավորումներն ու մասնագետները կան հետվիրահատական շրջանում բուժօգնություն ցուցաբերելու համար», -պատասխանելով տուժող կողմի ներկայացուցչի հարցին, ասաց անեսթեզեոլոգիայի և ինտենսիվ թերապիայի բաժանմունքի վարիչը:

Պատասխանելով դատավորի հարցին, Ամրոյանն ասաց, որ նյարդաբանին հրավիրել են հարևան հիվանդանոցից: Դատավորը հետաքրքրվեց՝ «Պարտավո՞ր էր գալ», Ամրոյանը բացասական պատասխան տվեց, և դատավորի մոտ տրամաբանական հարց առաջացավ. «Ինչո՞ւ հիվանդանոցը չունի համապատասխան մասնագետ»:

«Նեղ մասնագետներ մեզ մոտ չկան: Այդ հարցը հավանաբար պետք է տնօրենին տալ», -պատասխանեց Ամրոյանը:

Հաջորդը ցուցմունք տվեց մանկաբարձական բաժանմունքի ղեկավար Աշոտ Սիրունյանը և ասաց, որ իր ղեկավարությամբ են աշխատում Շուշանիկ Բախշյանն ու Անի Բաբելյանը: Նրա խոսքով, մանկաբարձության գծով 4 տարվա մասնագիտացում է անհրաժեշտ, որպեսզի կարողանան աշխատեն որպես մանկաբարձ-գինեկոլոգ:

Տուժող կողմի ներկայացուցիչ, փաստաբան Մարինե Թովմասյանը Աշոտ Սիրունյանից հետաքրքրվեց, թե ռիսկային հղիին վարելու, հետևելու իրավասություն արդյոք ունեցե՞լ է Շուշանիկ Բախշյանը, ինչին Սիրունյանը դրական պատասխան տվեց:

Շարունակելով թեման, տիկին Թովմասյանը նկատեց, որ իրենց տեղեկություններով և իրենց ձեռքի տակ առկա փաստաթղթի համաձայն, որը ստացվել է Առողջապահության ազգային ինստիտուտից, Շուշանիկ Բախշյանն ունի ընդամենը 6 ամսվա վերապատրաստում և այդ պարագայում նրան վստահվել է Մերի Մարգարյանի նման ծանր վիճակում գտնվող հղի:

Չնայած ամբաստանյալ Բախշյանի փաստաբան Ալեքսանդր Սիրունյանի առարկություններին, Մարինե Թովմասյանը միջնորդեց դատարանին հրապարակել Բախշյանի համալսարանական դիպլոմը ու մանկավարժ-գինեկոլոգ լինելու մասին վկայականը:

Հրապարկաված փաստաթղթի համաձայն, Շուշանիկ Բախշյանն Առողջապահության ազգային ինստիտուտում 1997 թվականի սեպտեմբերի 1-ից մինչև 1998 թվականի փետրվարի 28-ը անցել է մասնագիտացում մանկաբարձության և գինեկոլոգիայի ծրագրով: Իսկ համալսարանական դիպլոմի համաձայն, Շուշանիկ Բախշյանը մասնագիտացել է «բուժական գործ» մասնագիտությամբ:

«Այսինքն՝ ընդհանուր չորս տարի բուժական գործ ավարտելուց հետո առկա է վկայականը, բայց կոնկրետ գինեկոլոգիա, մանկաբարձություն մասնագիտացվածության վերաբերյալ առկա է միայն այդ վկայականը վեց ամսվա ընթփացքում ստացած վերապատրաստումից», -հայտարարեց տուժողի ներկայացուցիչ-փաստաբան Մարինե Թովմասյանը:

Այս ամենից հետո դատավորը Բախշյանի ղեկավարից՝ ցուցմունք տվող Աշոտ Սիրունյանից հետաքրքրվեց, թե Շուշանիկ Բախշյանը ունե՞ր իրավունք բարձր ռիսկի տակ գտնվող հղիներով զբաղվելո՞ւ, թե՞ ոչ:

Ի պատասխան, Սիրունյանն ասաց, թե Բախշյանի մասնագիտացման մասին փաստաթղթերի լինել-չլինելու մասին տեղյակ չէ, քանի որ Բախշյանն այդտեղ աշխատանքի ընդունվել է իրենից առաջ:

«Եթե անձը կոմպետենտ չէ, ինչո՞ւ եք թույլ տալիս, որ այդ գործն անի: Արդյոք Շուշանիկ Բախխյանի մասնագիտացումը, ըստ ձեզ, բավարարում էր, որպեսզի դուք թույլատրեիք նրան հսկել բարձր ռիսկայնություն ունեցող հղիին», -Սիրունյանից հետաքրքրվեց դատավորը:

«Այո», -պատասխանեց Սիրունյանը:

Ներկայացված փաստաթղթերի վերաբերյալ պաշտպանական կողմը ներկայացնող փաստաբան Ալեքսանդր Սիրունյանը դատավորի թույլտվությամբ հայտարարեց, որ իր պաշտպանյալը բուհական կրթությունն ստացել է խորհրդային տարիներին, երբ «բուհական համակարգն ուրիշ էր, քան այսօր է»:

Ձայնի իրավունք խնդրեց նաև Բախշյանը և հայտարարեց, որ ինքը համապատասխան մասնագիտացմամբ ստացել է լիցենզիա և միայն այդ դեպքում սկսել աշխատել որպես մանկաբարձ-գինեկոլոգ:

«Առանց դրա հնարավոր չէ աշխատել», -նկատեց Բախշյանը: