Ձեր վստահելի աղբյուրը

Հայաստանի ազգային կինոկենտրոնի (ՊՈԱԿ) և «ՌեԱնիմանիա» միջազգային անիմացիոն ֆիլմերի փառատոնի  հրավերով   աշխատանքային այցով Երևան են գտնվում  Եվրոպայի խորհրդի մշակութային աջակցության Եվրիմաժ  (Eurimages)հիմնադրամի գործադիր տնօրենի տեղակալ Իզաբել Կաստրոն  և Եվրիմաժի անիմացիոն և խաղարկային ֆիլմերի գծով փորձագետ Իրիս Կադուն: Այս մասին հայտնում են Հայաստանի Ազգային կինոկենտրոնից: 

Այսօր կայացած ասուլիսում  Եվրիմաժի ներկայացուցիչները կինոարտադրողներին ներկայացրել են Եվրիմաժի և այլ  կինոհիմնադրամների գործունեության առանձնահատկությունների  և հայտեր ներկայացնելու կարգի մասին:  Ոլորտի մասնագետներին ծանոթացրել են համատեղ արտադրության և տեղական կինոթատրոնների  աջակցության ծրագրերին:

Ասուլիսից հետո տեղի է ունեցել հանդիպում հայաստանյան կինոարտադրողների և կինոգործիչների հետ, որոնք հարց ու պատասխանի միջոցով ստացել են իրենց հետաքրքրող հարցերի պատասխանները:

Նոյեմբերի 2-ին արդեն  տեղի կունենան  անհատական աշխատանքային հանդիպումներ տեղական կինոգործիչների հետ ( պրոդյսերների, ռեժիսորների և  կինոլորորտի այլ  մասնագետների հետ):

Մասնակիցները հնարավորություն կունենան խորհրդատվություն ստանալու և իրենց կինոնախագծերը մանրամասնորեն քննարկելու Եվրիմաժի փորձագետների հետ: Անհատական հանդիպումների համար արդեն ստացվել է 45 հայտ: Յուրաքանչյուր նախագծի համար նախատեսված է 15 րոպե: Աշխատանքային լեզուն լինելու է անգլերենը:

Հիշեցնենք, որ Հայաստանը 2016 թվականի հունվարից անդամակցում է  Եվրիմաժ (Eurimages) հիմնադրամին, որպես 37-րդ անդամ պետություն: Նոյեմբերին կայանալիք այցը՝ Եվրիմաժի ներկայացուցիչների առաջին պաշտոնական այցն է Հայաստան:

Եվրիմաժի ներկայացուցիչների հայաստանյան այցն անցկացվում է «ՌեԱնիմանիա» միջազգային անիմացիոն ֆիլմերի փառատոնի շրջանակներում: Այցն իրականացվում է ՀՀ Մշակույթի նախարարության աջակցությամբ: