Ձեր վստահելի աղբյուրը

Այսօր խորհրդարանում Երևանի փոխքաղաքապետ Կամո Արեյանը լրագրողների հետ զրույցում նշեց, որ իրենց առջև ծառացած ամենասուր խնդիրներից են հասարակական տրանսպորտն ու բազմաբնակարան շենքերի վերելակները:

Նրա խոսքերով՝ վերելակային տնտեսությունը «Համատիրությունների մասին» ՀՀ օրենքով դրա մեջ տեղավորված բաժնային սեփականություն է:

«Մենք նոր օրենք ենք նախաձեռնել, որը գրեթե պատրաստ է: Օրենքում դրել ենք պարտադիր վճարի գաղափարը, որպեսզի ապահովված լինի շահագործման և պահպանման համար վճարի գանձումը»,- ասաց նա:

Կամո Արեյանը նշեց, որ մինչ այդ Երևանի քաղաքապետարանն ակտիվ բանակցություններ է վարում տարբեր կառույցների հետ՝ վերելակային տնտեսության թարմացման հարցով:

«Վերելակների տարիքային տարբերությունը շենքերի միջև շատ մեծ է, տարողության տարբերությունը, տեխնիկական վիճակը նույնպես տարբեր է, գերակշիռ մասն անհանգստացնող: Իհարկե, տեխնիկական զննում իրականացվում է, սարքավորումների, պահեստամասերի փոխարինում, ճոպանի, բոլոր կարևորագույն մասերի ամենօրյա հետևել կա, բայց տեխնիկապես և բարոյապես արդեն մաշված են վերելակները»,- նշեց քաղաքապետի տեղակալը՝ հավելելով, որ պիտի իրականացնեն աշխատանքներ, որպեսզի կարգավորեն այս խնդիրը:

Կամո Արեյանը տեղեկացրեց, որ Երևանում նորակառույց բազմաֆունկցիոնալ շենքերում տեղադրվում են  ժամանակակից վերելակներ: «4651 վերելակ կա հաշվեգրված մայրաքաղաքում: Մենք ունենք 5000 բազմաբնակարան շենք, որոնք կառուցվել են խորհրդային տարիներին: Մնացած բոլոր շենքերը նոր են և ունեն  ժամանակակից վերելակներ»,- ընդգծեց Կամո Արեյանը:
Ըստ նրա՝ հիմա հաշվարկում են, թե որքան գումար է հարկավոր վերելակները նորերով փոխարինելու համար: «Տարբեր հաշվարկներ ենք իրականացնում, քանի որ  տարբեր արտադրողներ տարբեր գներ են առաջարկում»,- ասաց նա:

Հիշեցնենք, որ հոկտեմբերի 30-ին Երևանի Խաղաղ Դոնի փողոցի թիվ 23 շենքի վերելակում   քաղաքացին արգելափակվել էր վերելակում: Նրան տեղի ուժերով դուրս էին  բերել արգելափակումից և տեղափոխել հիվանդանոց, որտեղ նրա առողջական վիճակը գնահատվել է ծայրահեղ ծանր:

Անդրադառնալով հասարակական տրանսպորտի խնդրին՝ Կամո Արեյանն ասաց, որ նախատեսվում է երթուղային ցանցի, շարժակազմի վերանայում: «Պետք է գնանք նրան, որ մայրաքաղաքում մեծ և միջին տեղատարողությամբ ավտոբուսներ շահագործենք,  միկրոավտոբուսներից պետք է ձերբազատվենք»,- նշեց նա:
Հարցին, թե փոփոխությունները նշանակում են, որ այլևս գծատերեր չեն լինի, Կ.Արեյանը պատասխանեց, որ այսքան շատ միկրոավտոբուս ու այսքան շատ գծատեր, իհարկե, չեն լինի: