Ձեր վստահելի աղբյուրը

«2017 թվականի  պետական բյուջեի նախագիծը բարդ էր ամբողջությամբ պատրաստելը` հաշվի առնելով այն հանգամանքը, որ 2017 թվականի առաջին կեսին Ազգային ժողովն աշխատելու է մի տրամաբանությամբ, այնուհետև այդ տրամաբանությունը փոխվելու է, հետևաբար հնարավոր է որոշակի վերապահումներ կատարվեն»,- ԱԺ-ում 2017 թվականի բյուջեի նախագծի քննարկմանն ասաց ՀՀ Ազգային ժողովի աշխատակազմի ղեկավար Հրայր Թովմասյանը:

Նրա խոսքով՝ այս առումով եկող տարվա բյուջեն ոչ ստանդարտ է՝ հաշվի առնելով ոչ միայն ԱԺ ընտրությունները, նաև այն բոլոր փոփոխությունները, որոնք պայմանավորած են Սահմանադրությամբ և ԱԺ կանոնակարգ օրենքով: Հ.Թովմասյանն ասաց, որ 2016 թվականի բյուջեի նկատմամբ կա տարբերություն: Երեք ծրագրերից երկուսը նույնությամբ մնացել են. միջազգային կազմակերպություններին  ՀՀ անդամակցության վճարները՝ 153 միլիոն  դրամ, ԱԺ աշխատակազմի պետական ծառայողների վերապատրաստում՝ 1 միլիոն 265 հազար դրամ:

«Հիմնական փոփոխությունները պայմանավորված են  առաջին ծրագրով՝ «ԱԺ աշխատակազմի և պատգամավորների պահպանում ծրագրով»,  որտեղ մենք ունենք 390 միլիոն 229  հազար դրամի տարբերություն: Դա պայմանավորված է պատգամավորների թվի  հնարավոր կրճատման հանգամանքով»,- նշեց նա:

Նրա խոսքով՝ բյուջեով   պատգամավորների թիվ է ընդունվել 101-ը, սակայն այդ թիվը կարող է մեծանալ կախված այն հանգամանքից, ինչն առկա է  Ընտրական օրենսգրքում: Միաժամանակ Հ. Թովմասյանը նշեց, որ ևս երեք տեղ ԸՕ-ով նախատեսում է փոքրամասնության ներկայացուցիչներին. «Առնվազն այս պահին գիտենք, որ լինելու է  104 պատգամավոր, երեք պատգամավորի հաշվարկով պետք է վերահաշվարկ կատարվի»:

Նրա խոսքով՝ Սահմանադրությամբ նախատեսվում է, որ ԱԺ նախագահն այսօրվա երկու տեղակալի փոխարեն պետք է ունենան երեք տեղակալ, հետևաբար մեկ տեղակալի և նրա աշխատակազմի ծախսերը ևս հաշվարկված չեն, ընդհանուր կազմում է 12 միլիոն դրամ: 

Հ. Թովմասյանն ասաց, որ պատգամավորների լիազորությունների ավարտին նրանց օգնականները պետք է ազատվեն աշխատանքից, հետևաբար պետք է կատարվի վերահաշվարկ: Ընդհանուր գումարը կազմում է 168  միլիոն 824 հազար, որը բյուջով նախատեսված չէ:

Բյուջեի նախագծում նախատեսված չէ նաև ևս մեկ ծախսային հոդված. ԱԺ կանոնակարգ օրենքի նախագծով՝ ԱԺ պատգամավորների հայտարարությունները պետք է պարտադիր հեռարձակվեն հեռուստատեսությամբ:  Մոտավոր հաշվարկներ են կատարված, կազմում է 12-15 միլիոն դրամ:

«Բյուջեի նախագծով նախատեսված չէ, բայց անհրաժեշտ է լինելու մշտական հանձնաժողովների  երկու դահլիճների վերազիննում՝ պայմանավորված այն հանգամանքով, որ ԱԺ մշտական հանձնաժողովներն են դառնալու օրենսդրական նախաձեռնություններից հետո նախագծերը  հիմնական քննարկողները: Հնարավոր է հանձնաժողովների անդամների թիվը մեծանա:

Քննարկումներն արդյունավետ կազմակերպելու, սղագրությունը, քվեարկությունը կազմակերպելու համար անհրաժեշտ կլինի երկու դահլիճ կահավորել մոտավորապես այնպես, ինչպես մեր ԱԺ լիագումար նիստերի դահլիճն է»,- ասաց  ԱԺ աշխատակազմի ղեկավարը:

Նա նաև նշեց, որ ավադույթի համաձայն,  վերջին  նստաշրջանի ժամանակ տպագրվում է  գրքույկ՝ բոլոր պատգամավորներն իրենց կենսագրություններով. «Ամենապարզ, հասարակ եղանակով դրանց կազմելու համար չորս միլիոն դրամ անհրաժեշտ կլինի»:

Հ. Թովմասյանի խոսքով՝ բյուջեի նախագծով նախատեսված չէ, բայց անհրաժեշտ է լինելու  էլեկտրոնային փաստաթղթաշրջանառության   համակարագի ներդրում: 

«Բյուջեի նախագծով  նախատեսված գումարից բացի լրացուցիչ  անհրաժեշտ է լինելու 262 միլիոն 588 հազար դրամ, որից 168 միլիոնը պատգամավորների օգնականներին աշխատանքից ազատման հետ կապված վերահաշվարկ կատարելու համար է, իսկ 100 միլիոնը պայմանավորված են կանոնակարգ օրենքի փոփոխությամբ»,- ասաց ԱԺ աշխատակազմի ղեկավարը: