Ձեր վստահելի աղբյուրը

2017 թվականի  պետական բյուջեի նախագծով ՀՀ օրենսդիր, գործադիր, դատական իշխանության մարմինների պահպանման ծախսերի ընդհանուր գումարն՝ առանց այդ ոլորտում իրականացվող նպատակային վարկային և դրամաշնորհային ծրագրերի, ծրագրված է 88175.9 մլն դրամի չափով, որը 2015-ի փաստացիի  նկատմամբ կազմում է 97.5 տոկոս, իսկ 2016-ի համար հաստատվածի նկատմամբ 95.5 տոկոս: Ազգային ժողովում 2017 թվականի պետական բյուջեի նախագծի քննարկման ժամանակ հայտարարեց ֆինանսների նախարարի տեղակալ Ատոմ Ջանջուղազյանը:

Բյուջեի նախագծում նշված է, որ հաջորդ տարի անցկացվելու են ԱԺ, Երևան քաղաքի ավագանու հերթական ընտրությունները: Այդ ընտրությունների, ինչպես նաև ՏԻՄ ընտրությունների համար ծախսերը ծրագրավորվել են համապատասխանաբար 2,524.4 մլն դրամի, 591.6 մլն դրամի,  183.6 մլն դրամի չափով:

ՀՀ դեսպանությունների և ներկայացուցչությունների պահպանման ծախսերը հաջորդ տարվա համար ծրագրավորվել են 9635.0 մլն դրամի չափով:

Քննարկման ժամանակ պատգամավոր Տիգրան Ուրիխանյանը Ատոմ Ջանջուղազյանից հետաքրքվեց, թե պարբերաբար խոսվում է պետական համակարգում ծախսերի կրճատման մասին, արդյո՞ք կարող են ասել, թե հաջորդ տարի որքան կկազմի տնտեսումը: Նաև հետաքրքրվեց, թե տեղեկատվություն կա, որ դատական դեպարտամենտում հաստիքներ են կրճատվելու. «Ինձ մտահոգում է այն, թե դատական գործերի արդյունավետ և արագ սպասարկման մասով որքանով այդ կրճատումները կանդրադառնան»:

Ատոմ Ջանջուղազյանն ասաց, որ պետական իշխանության մարմինների պահպանության ծախսերի համար հաջորդ տարվա բյուջեով նախատեսվում է հատկացնել 88,2 մլրդ դրամ, ինչը  նախորդ տարիների համեմատ նվազել է, սակայն խոսքը չի վերաբերում մեխանիկական կրճատումների մասին չէ: «Եթե դա հիմնավորված չէ, գործառույթների օպտիմալացման արդյունք չէ, ապա վտանգը շատ մեծ է, որ դա կարող է մեկ ուրիշ տեղ ավելի  մեծ ավելացման հանգեցնի»,- ասաց Ատոմ Ջանջուղազյանը:

Ինչ վերաբերում է դատական դեպարտամենտին, ապա, ըստ նրա, 2016 թվականի համեմատ ծախսերը նվազել են շուրջ 79,5 մլն դրամով, սակայն աշխատավարձերի մասով նվազում չկա: