Դատավորի կաշառքի գործով մեղադրյալ փաստաբանը հրաժարվել է հանրային պաշտպանից

Իրավունք 11:35 02/11/2016

Դատավորի կաշառքի գործով մեղադրյալ փաստաբանը հրաժարվել է հանրային պաշտպանից

Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի վերաբերյալ քրեական գործով անցնող մեղադրյալ Փաստաբանների պալատի փաստաբան Էլզա Զաքարյանը հրաժարվել է հանրային պաշտպան Լյուդվիգ Ավետիսյանի ծառայություններից:

«Հենց առաջին օրը Էլզան հրաժարվել է իմ ծառայություններից: Նա ասաց, որ կամ ինքը կպաշտպանի իրեն, կամ էլ կօգտվի այլ փաստաբանի ծառայություններից», -Panorama.am-ին տեղեկացրեց Լյուդվիգ Ավետիսյանը:

Ավելի վաղ ԱԱԾ-ն տեղեկություն էր տարածել, որի համաձայն, Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանը քաղաքացիական գործով կողմի օգտին որոշում կայացնելու համար պահանջել և երևանյան գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո:

Այդ ամենը ներկայացնող տեսանյութ էր ԱԱԾ-ն հրապարակել: Քրեական գործն ուղարկվել էր Գլխավոր դատախազություն, որտեղից էլ՝ ՀՔԾ։

Ավելի ուշ Հատուկ քննչական ծառայությունը տեղեկացրեց, որ դեպքի առթիվ ՀՀ քրեական օրենսգրքի 311-րդ հոդվածի 4-րդ մասի 3-րդ կետով` (դատավորի կողմից խոշոր չափով կաշառք ստանալը) հարուցվել է քրեական գործ:

Եվ դրանից հետո միայն Գլխավոր դատախազությունը ԱԽ-ին միջնորդել էր այս գործով մեղադրյալ ներգրավել ու կալանավորել նրան։ Արդարադատության խորհուրդը որոշել էր բավարարել դատախազության միջնորդությունը:

Այս քրեական գործով կաշառքի միջնորդություն կատարելու համար փաստաբան Էլզա Զաքարյանին մեղադրանք է առաջադրվել ՀՀ քրեական օրենսգրքի 313-րդ հոդվածի 1-ին մասով՝ «կաշառքի միջնորդությունը»: Փաստաբանի նկատմամբ որպես խափանման միջոց կիրառվել է չհեռանալու մասին ստորագրությունը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: