Ձեր վստահելի աղբյուրը

«Պաշտոնյաները ցանկանում են դոկտորական աստիճան ստանալ, քանի որ ամեն ինչ ունենալու մոլուցք ունեն»,-այսօր լրագրողների հետ հանդիպմանն ասաց Բարձրագույն որակավորման հանձնաժողովի նախագահ Լիլիթ Արզումանյանը՝ անդրադառնալով պաշտոնյաների գիտական աստիճան ստանալուն:

Նրա խոսքով՝ սա հիվանդ հասարակության արդյունք է. «Միայն գիտությամբ զբաղվողը կարող է գիտական աստիճանի վկայական ունենալ, այլ տարբերակն արդեն նորմալ չէ»:

Լրագրողները ԲՈՀ նախագահից հետաքրքրվեցին՝ ինչպե՞ս է ստացվել Սյունիքի նախկին մարզպետի դոկտորի կոչում ունենալը, որի մասին հենց ինքն էր հայտարարել, Լիլիթ Արզումանյանն ասաց. «Սուրիկ Խաչատրյանը դոկտոր չէ, նրա հարցով հոգնեցինք, նա դոկտոր չէ, մի անկապ թուղթ ուներ: Նա մեզ մոտ չի պաշտպանել»:

Իսկ ինչ վերաբերում է Երևանի քաղաքապետ Տարոն Մարգարյանի պաշտպանության ժամանակ համալսարանից լրագրողներին դուրս հանելուն և գաղտնի պաշտպանություն անցկացնելուն՝ մասնագետն ասաց, որ իրենք չեն փակել և անգամ տեղյակ չեն եղել, որ պաշտպանությունը փակ է լինելու:

«Պաշտոնյաներն իրենց գիտական աշխատանքներն արտագրում կամ պատվիրում են, սակայն այստեղ ես մեղադրում եմ նաև գիտնականներին, որ իրենք խելքը վաճառում են: Ցավոք սրտի, մեր ամենակարող պաշտոնյաները գրել են տալիս, այդ գրողներն էլ երևի վախից լավ են գրում: Բայց ես այն կարծիքին եմ, որ նորմալ գիտնականը խելքը չի ծախի անկապ մարդու, իսկ հասարակությունը նմաններին չպետք է ընդունի»,-հավելեց ԲՈՀ նախագահը: