Ձեր վստահելի աղբյուրը

Ազգային ժողովի սոցիալական հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում այսօր ՀԱԿ խմբակցության քարտուղար Արամ Մանուկյանը բյուջեի սոցիալական ծրագրերին ուղղված ծախսերը ներկայացնող նախարար Արտեմ Ասատրյանին ասաց՝ ոլորտը գտնվում է «կատաստրոֆայի շեմին»:

«Երկիրը, որտեղ մենք ապրում ենք, շատ ծանր վիճակում է, իսկ դաշտը, որտեղ դուք աշխատում եք, կատաստրոֆայի  շեմին է»,-ասաց օրենսդիր մարմնի ներկայացուցիչը:

Նա հիմնավորեց, որ արտագաղթում է  հիմնականում արտադրողունակ հատվածը, որը եկամուտ էր ապահովում, մնում է սոցիալապես անապահով խավը:

«Դրսում Հրանուշն է Հակոբյան, ինքը կդառնա համայն սփյուռքի նախագահ, դուք էլ կդառնաք թոշակառուների նախարար ու միակ նախարար»,-նման կանխատեսում արեց ընդդիմադիր գործիչը:

Անդրադառնալով բյուջեի նախագծով սոցիալական ոլորտի ծախսերին, Մանուկյանն ասաց, լավ միջոցառումներ են, բայց առանց ռադիկալ փոփոխությունների՝ այստեղ պայթյունէ  սպասվում:

«Ամենևին չեմ չափազանցնում, ամենևին»,-ասաց պատգամավորը, հիշեցնելով, որ պաշտոնական թվերով Հայաստանում բնակչության 1/3-ն աղքատ է, իսկ ոչ պաշտոնական թվերով հնարավոր է 50 տոկոսը:

Նախարարից նա հետաքրքրվեց, թե ինչով են կանխելու հնարավոր այդ պայթյունը, ո՞րն է ռազմավարական ծրագիրը մարտահրավերների դեմն առնելու համար:

Աշխատանքի և սոցիալական հարցերի նախարար Արտեմ Ասատրյանը պատասխանեց, որ աղքատության, գործազրկության կրճատումը, սոցիալական բեռի թեթևացումը տնտեսության աճն է, ակտիվությունը, գործարար միջավայրի բարելավումը, բարիք ստողծողների համար հնարավորությունների ու պայմանների ստեղծումը:

«Կառավարության ծրագրում այդ ամբողջը  ներկայացված է: Այն ենթադրում է նորմալ, հավասար պայմանների ստեղծում առավելագույն բարիք ստեղծելու, ներդրումներն ավելացնելու համար»,-ասաց նախարարը:

Ինչ վերաբերում է բարիքը վերաբաշխելուն, նախարարն ասաց, վերջին տարիներին ներդրվել են համակարգեր, որոնց շնորհիվ ծրագրերն առավել հասցեական ու արդյունավետ են դարձել:

«Դուք ասում եք, 15 հազար անձի համար զբաղվածության ծրագիրը բավարա՞ր է: Իհարկե, բավարար չէ: Իհարկե շատ ավելի մեծ ծրագրեր իրականացնելու կարիք կա, բայց այսօր մենք փորձում ենք առկա հնարավորությունների շրջանակում առավելագույնն անել»,-ասաց գործադիր մարմնի ներկայացուցիչը: