Ձեր վստահելի աղբյուրը

Ազգային ժողովում այսօր 2017 թվականի պետական բյուջեի քննարկումների ժամանակ ԲՀԿ խմբակցության ղեկավար Նաիրա Զոհրաբյանը Աշխատանքի և սոցիալական հարցերի նախարար Արտեմ Ասատրյանից հետաքրքրվեց, թե գործազուրկների նպաստի կրճատումից հետո քանի՞ գործազուրկ է ընդունվել աշխատանքի:

«Հիշում ենք հերոսական ռեֆորմատոր Տիգրան Սարգսյանի կառավարության որոշումը, որով 18 հազար դրամ գործազրկության նպաստը հանվեց: Այն հետագայում պետք է տրվեր ինչ-որ կենտրոնների՝ ուսուցում կազմակերպելու, այնուհետ ծրագրի մասնակիցներին աշխատանքով ապահովելու համար: Արդեն քանի տարի անցել է այդ ծրագրից, քանի՞ գործազուրկ է ուսուցանել այդ կենտրոններում և քանիսն են աշխատանք ստացել»,- հարցրեց Նաիրա  Զոհրաբյանը և խնդրեց մատնանշել այդպիսի կենտրոններից գոնե մեկի անունը:

Աշխատանքի և սոցիալական հարցերի նախարար  Արտեմ Ասատրյանը նշեց, որ 2015 թվականին մասնագիտական ուսուցման ծրագրում ընդգրկվել է 969 անձ, որոնց 87,2%-ը դարձել է կայուն զբաղված: Դա նշանակում է, որ անձը դարձել է վարձու աշխատող, աշխատավարձ է ստացել, եկամտահարկ է վճարել:

«Իհարկե, աշխատաշուկայում կա  առաջարկի և պահանջարկի դիսբալանս, աշխատաշուկայում կան անմրցունակ անձինք, սակայն զբաղվածության ոլորտում իրականացվող պետական ծրագրերն ուղղված են աշխատաշուկայում բացառապես անմրցունակ անձանց` երկարատև գործազուրկներին, որոնք չեն կարողանում իրենց տեղը գտնել աշխատաշուկայում»,- նշեց Արտեմ Ասատրյանը:

Ըստ նրա՝ Զբաղվածության գործակալության միջոցով  տարվա ընթացքում շուրջ 15 հազար մարդ տեղավորվում է աշխատանքի: «Գործազրկության  նպաստի ծրագիրն ապահովում էր 6 տոկոս կայուն զբաղվածության գործակից, իսկ այս ծրագրերը՝ 75% և ավելի կայուն զբաղվածության գործակից»,- ասաց նախարարը: