Ձեր վստահելի աղբյուրը

«Մոսկվա» կինոթատրոնում «Ունիսոն» ՀԿ-ն անցկացրեց «Երազանք և իրականություն» ինտերակտիվ ֆորում, որի ժամանակ կայացավ ֆոտոցուցահանդեսի բացում, հանրային կարծիքը բացահայտող կարճ տեսահոլովակների ցուցադրություն և հրապարակումների շնորհանդես։
«Ունիսոն» ՀԿ-ի նախագահ Արմեն Ալավերդյանը Panorama.am-ի հետ զրույցում ասաց, որ նման ֆորումի անցկացման նպատակն է  հաշմանդամության վերաբերյալ հանրային կարծիքն ավելի ճիշտ ներկայացնելը, կարծրատիպերը կոտրելը:

«Հասարակության կարծիքը, իհարկե, տարիների ընթացքում փոխվում է, բայց դանդաղ: Հիմա էլ փողոցում չեն նայում զարմացած, խղճահարությամբ, բայց գործատուների, որոշում կայացնողների մոտ կան կարծրատիպեր, որոնք խոչընդոտում են մարդկանց ինտեգրվելուն»,- ասաց Ա. Ալավերդյանը:

Հայկ Պապիկյանը չի տեսնում, բայց նա ակտիվ  գործունեություն  է ծավալում. մերսող է, պատմաբան, երգում է «Փարոս» երգչախմբում:

«Տարբեր ծրագրեր եմ իրականացնում: Վերջին ծրագիրն իրականացրել ենք մոտակա քաղաքներոմ՝ «Հասարակությունն առանց խտրականության»: Մեր նպատակն  այն է, որպեսզի հաշմանդամություն ունեցող երեխաների ծնողները հասկանան՝ ինչպիսի մոտեցում ցուցաբերել, որպեսզի երեխան ոչ թե հիասթափվի, այլ կյանքում նպատակ ունենա և ձգտի հասնել այդ նպատակին»,- ասաց Հայկը:

Նրա կարծիքով՝  իհարկե, նպատակին հասնելու համար խոչընդոտները շատ են, բայց այդ բոլորը հաղթահարելի են:

«Հաշմանդամություն ունեցող անձանց թիվ մեկ խնդիրն աշխատանքն է: Եթե դա էլ լուծվի, շատ լավ կլինի: Երբ որ հաշմանդամն ընդունվում է համալսարան, պետությունն իր վրա գումար է ծախսում: Բայց եթե մի բան արվում է, պետք է շարունակությունն էլ արվի, ապահովվեն աշխատանքով»,- ասաց Հայկ Պապիկյանը:

Շուշան Նահապետյանն աշխատում է «Ունիսոն» ՀԿ-ում: Նրա խոսքով՝ արդեն հաջողություն է, որ մարդն աշխատում է, տանից դուրս է գալիս:

«Տարիներ առաջ ինչպիսին էր իմ կյանքը, հիմա ինչպիսին է: Տարբերությունը շատ մեծ է: Ուրախ եմ, որ այսօրվա դրությամբ ունեմ աշխատանք, ամուսնացած եմ, ունեմ որդի: Իհարկե, դժվարությունները շատ են, ուղղակի մարդ պետք է նպատակ դնի իր առջև և հասնի: Բոլորի համար էլ  դժվար է այս կյանքում: Չպետք է մարդ մեկուսանա: Մարդկանց մեջ պետք է այն գիտակցումը լինի, որ բոլոր մարդիկ հավասար են: Յուրաքանչյուր մարդ  այս աշխարհում ապրելու, արարելու իրավունք ունի»,- ասաց Շ. Նահապետյանը:

Նա հավատում է, որ տարիների ընթացքում այլևս չի լինի տարբերություն մարդկանց միջև, բոլորը հավասար կլինեն:

Հայաստանում ՄԱԿ-ի համակարգող, ՄԱԶԾ մշտական ներկայացուցիչ Բրեդլի Բուզետոն Panorama.am-ի հետ զրույցում ասաց, որ հնարավորինս շատ պետք է խոսվի, ներկայացվի հաշմանադամություն ունեցող մարդկանց խնդիրները:

«Նրանք մեզանից շատ տարբեր չեն, նրանք մեզ նման են: Կարևորն այն է, որ ինտեգրված լինեն հասարակությանը, նրանք իրավունք ունեն ստանալ կրթություն և աշխատել: Կարևոր է, որ հասարակությունում բոլոր մարդիկ լինեն հավասար»,- ասաց ՄԱԿ-ի ներկայացուցիչը:

Նրա խոսքով՝  Հայաստանի կառավարությունը բավականին դրական քայլեր իրականացրել է այդ ուղղությամբ, սակայն անհրաժեշտ է շատ ավելին արվի, քան արվել է մինչև հիմա: 

Աշխատանքի և սոցիալական հարցերի նախարարության Հաշմանդամների և տարեցների հիմնահարցերի վարչության պետք Արթուր Կեսոյանն ասաց, որ վերջին տարիներին հաշմանդամություն ունեցող անձանց խնդիրներն ավելի ակտուալ են դարձել:

«Մենք մշակել ենք «Հաշմանդամության մասին»  օրենքի նախագիծ, որը ներկայացնելու ենք կառավարությանը: Ազգային ժողովի կողմից վավերացվելուց հետո ամբողջությամբ աշխատելու ենք այդ օրենքով, որում ներառված են բոլոր խնդիրները, ինչ վերաբերում է հաշմանդամություն ունեցող անձանց: Բոլոր գերատեսչությունների համար կան առանձին դրույթներ, հոդվածներ, բոլոր նախարարություններն անմիջական կապ ունեն հաշմանդամություն ունեցող անձանց խնդիրների հետ»,- ասաց Ա. Կեսոյանը: