Ձեր վստահելի աղբյուրը

Ազգային ժողովում 2017 թվականի պետական բյուջեի քննարկման ժամանակ ՀՀԿ խմբակցության  պատգամավոր Խոսրով Հարությունյանն ասաց,  որ 2017 թվականը լինելու է այն ժամանակահատվածը, երբ բոլորը ոլորտներում, այդ թվում՝ գյուղատնտեսության, պետք է նախատեսեն այնպիսի բարեփոխումներ, որոնք հետագայում դինամիկ զարգացման համար կստեղծեն անշրջելի նախադրյալներ:

«Հիմա գյուղատնտեսության առանձնահատկությունն այն է, որ հողի սեփականաշնորհման արդյունքում մենք ունենք 430 հազար գյուղացիական տնտեսություն, որոնք տնօրինում են 1 մլն 200 հազար փոքր հողակտորների, և այդ դեպքում անհնար է ապահովել բարձր արտադրողականություն, ուստի անհրաժեշտ է հողերի խոշորացում»,- ասաց Խոսրով Հարությունյանը՝ հավելելով, որ գյուղատնտեսության ոլորտում արտադրողականությունը 55 անգամ զիջում է շինարարության ոլորտի արտադրողականությանը:

Պատգամավորը հարցրեց՝ արդյոք եղած կոոպերացիայի մակարդակը բավարա՞ր է, որպեսզի կարողանան արդյունաբերական հիմքի վրա դնել գյուղատնտեսությունը:

Իգնատի Առաքելյանը պատասխանեց, որ հողերի օգտագործելիության խնդիրն իր համար բարդ, բայց նաև գերակա հարց է:

«Առանց հողերը օգտագործելու հնարավոր չէ արտադրողականության արդյունավետությունը բարձրացնել: Քննարկվում են խնդրի լուծման տարբեր մեխանիզմներ` կամ ավելացնել հողերի վարձակալությունը և տալ ենթավարձակալության, կամ բարձրացնել չօգտագործվող հողերի դրույքաչափը»,- ասաց նախարարը:

Ինչ վերաբերում է կոոպերացիաների մակարդակին, նա նշեց, որ դա ևս բավարար չէ: Նախարարությունը քննարկել է կոոպերացիաների հարցը: Ըստ նրա՝ այսօր ֆերմերը պատրաստ չէ կոոպերացվել, ուստի ինչ օրենք էլ գրեն, դա կլինի անհաջող կոոպերացիա:

«Պետք է մտածենք մեխանիզմներ, որ կոոպերացիաները ցանկալի լինեն»,- նշեց նախարարը:

Մանրամասները՝ տեսանյութում: