Ձեր վստահելի աղբյուրը

ՀՖՖ նախագահ Ռուբեն Հայրապետյանն այսօր լրագրողների հետ կայացած հանդիպման ժամանակ նշեց, որ նորանշանակ գլխավոր մարզիչ Արթուր Պետրոսյանից ակնկալում է ագրեսիվ ֆուտբոլ, քանզի ֆուտբոլիստ եղած տարիներին Պետրոսյանը հենց այդպես էր գործում: 

«Արդեն երկու տարի Արթուր Պետրոսյանն իմ գլխում է, և ես շատ ուրախ եմ, որ նա համաձայնվեց գլխավորել Հայաստանի ազգային հավաքականը` ունենալով գործող պայմանագիր «Ցյուրիխի» հետ: Նա հրաժարվեց այդ պայմանագրից և եկավ ազգային հավաքական: Արթուրը եղել է փայլուն ֆուտբոլիստ, հիանալի մարդ և, կարծում եմ, կլինի հիանալի մարզիչ: Վստահ եմ, որ նա իր գործը շատ լավ կկատարի: Պետրոսյանն ինչպես ագրեսիվ էր ֆուտբոլ խաղալու տարիներին, ըստ իս, հենց այդպիսի ագրեսիվ ֆուտբոլ էլ կդավանի»,- ասաց ՀՖՖ նախագահը:

Խոսելով նոյեմբերի 11-ին կայանալիք աշխարհի 2018 թ. առաջնության ընտրական փուլի Մոնտենեգրոյի հետ կայանալիք հանդիպման մասին, ՀՖՖ նախագահը նշեց, որ չի սիրում գուշակություններ անել, սակայն ցանկությունը մեկն է, որ Հայաստանի ընտրանին հաղթանակ տոնի:

Ինչ վերաբերում է վիրահատության ենթարկված Արաս Օզբիլիսին, ով հրավիրված էր և պետք է մասնակցեր հավաքականի առաջիկա խաղին, Հայրապետյանը տեղեկացրեց, որ Արթուր Պետրոսյանը զրուցել է նրա հետ:

«Արասը շատ ընկճված է, և ցավոք սրտի, բաց կթողնի հավաքականի առաջիկա հանդիպումը: Հուսանք նա արագ պակաքինվի: Ինչ վերաբերում է Հենրիխ Մխիթարյանին, ապա շատ ցավալի է, որ նրա մակարդակի ֆուտբոլիստի մասին խոսելիս նշվում է, որ խաղային պրակտիկայի պակաս ունի, բայց, հուսով ենք, որ նա կխաղա Եվրոպա լիգայի դիմակայությունում, հետո ևս մեկ հանդիպում կանցկացնի «Մանչեսթեր Յունայթեդում», նոր միայն կգա հավաքական: Ցավալի է, որ Մխիթարյանի նման ֆուտբոլիստը չի խաղում»,- նշեց Հայրապետյանը:

ՀՖՖ նախագահը, անդրադառնալով իր հրաժարականը ցանկացողներին, նշեց, որ պատրաստ է նման քայլի դիմել, եթե հայտնվի արժանի թեկնածու և ավելացրեց, որ եթե իրեն «չեն սիրում, գոնե թող սիրեն ֆուտբոլը»: