Ձեր վստահելի աղբյուրը

Կառավարության նիստում վարչապետ Կարեն Կարապետյանի հանձնարարականների մի  խումբ վերաբերում էր կոռուպցիայի դեմ պայքարին:

Առաջին հանձնարականն ուղղված էր արդարադատության նախարար Արփինե Հովհաննիսյանին. «Այն դեպքերում, երբ պաշտոնատար անձի ակտիվների աճը էականորեն գերազանցում է նրա օրինական եկամուտները, նա պետք է ենթարկվի քրեական պատասխանատվության: Հանձնարարում եմ ՀՀ արդարադատության նախարարին երկշաբթայա ժամկետում նախագիծը ներկայացնել կառավարությանը, խոսքը վերաբերում է  ապօրինի հարստացման քրեականացման մասին նախագծին»:

Վարչապետն ընդգծեց, որ նախագծի հետ անհրաժեշտ է ներկայացնել կանխիկ գործառնությունների սահմանափակող օրենքի նախագիծ:

«Այսպես կոչված կեղծ փոխառությունները, կեղծ նվիրատվությունները հիմնականում կատարվում են կանխիկ եղանակով, և գործընթացը դարձնում են սկզբունքորեն անվերահսկելի: Շատ դեպքերեում պարզ չի, արդյոք հայտարարագիր ներկայացրած անձը ստացե՞լ է  հայտարարագրում նշված փոխառությունը, թե՞ ոչ: Այս խնդիրների լուծման նպատակով հանձնարարում եմ ՀՀ արդարադատության նախարարին Կենտրոնական բանկի հետ համատեղ երկշաբթայա ժամկետում կառավարության քննարկմանը ներկայացնել կանխիկ գործառնությունների սահմանափակման  մասին օրենքի նախագիծը»,-ասաց նա:
Երրորդ հանձնարարականը վերաբերում է հակակոռուպցիոն մասնագիտացված մարմնի կատարելագործմանը:

«Նախ անհրաժեշտ է ընդլայնել բարձրաստիճան պաշտոնատար անձանց էթիկայի հանձնաժողովի լիազորությունները՝ սահմանելով և կրթական, և կոռուպցիայի կանխարգելման գործառնույթները: Բացի այդ, անհրաժեշտ է  նաև  կոռուպցիոն հանցագործությունների դեմ պայքարող իրավապահ մարմինների գործունեությունը դարձնել առավելագույնս հաշվետվողական: Այդ նպատակով պետք է օրենքով սահմանել պահանջ, որ այդ մարմինները կոռուպցիայի դեմ իրենց կատարած քայլերի մասին  յուրաքանչյուր տարի պետք է ներկայացնեն հանրային հաշվետվություն: Խոսքը վերաբերում է առանձին, հենց կոռուպցիայի մասին հաշվետվությանը»,-ասաց նա:

Կառավարության ղեկավարը հանձնարարեց ՀՀ արդարադատության նախարարին մեկ ամսյա ժամկետում ներկայացնել համապատասխան օրենսդրական նախագիծ:
Վարչապետի չորրորդ հանձնարարականը վերաբերում էր հայտարարգիր ներկայացնող անձանց շրջանակի ընդլայնամանը:

«Ներկայումս պաշտոնատար անձանց մի ստվար զանգված՝ օրինակ կառավարության անդամները, դատավարները և այլք, ներկայացնում են ահյտարարագիր, բայց կան պաշտոնատար անձինք, որոնք այց ցանկում ընդգրկված չլինելով, ընդգրկված են օրինակ պետական խոշոր գնումների գործընթացում, կամ կոռուպցիոն ռիսկեր ներկայացնող  այլ գործունեության մեջ: Այդ պատճառով ՀՀ արդարադատության նախարարին հանձնարարում եմ երեքշաբաթյա ժամեկտում  ներկայացնել կառավարություն ներկայացնել առաջարկություն՝  հայտարարգիր ներկայացնող անձանց շրջանակի ընդլայնաման վերաբերյալ՝ ելնելով ռիսկայանությունից»:

Բլոկի հինգերերորդ հանձնարարականը վերաբերում էր ազդարարների համակարգին: Կառավարության ղեկավարն ասաց, որ տարբեր երկրներում այս ոլորտում առկա փորձի ուսումնասիրությունը ցույց է տալիս, որ դասական մոտեցումները մեր երկրի համար այդքան էլ արդյունավետ չեն կարող լինել:

«Ուստի ՀՀ արադարադատության նախարարին հանձնարարում եմ երկամսյա ժամկետում մշակել արդյունավետ եղանակներ ազդարարների համակարգը ներդնելու ուղղությամբ»,-ասաց կառավարության ղեկավարը:

Արփինե Հովհաննիսյանին ուղղված վերջին հանձնարարականը վերաբերում էր քաղհասարակության, ընդդիմությայն ու բոլոր շահգրգիռ կողմերի  ներկայացուցիչների հետ հանդիպումների կազմակերպմանը:

«Ըստ անհրաժեշտության ներկայացնել առաջարկություն կոռուպցիայի դեմ պայքարի խորհուրդի կազմավորման սկզբունքների, ինչպես նաև կազմի վերանայման վերաբերյալ»,-ասաց նա: