Ձեր վստահելի աղբյուրը

Հայաստանի ֆուտբոլի ազգային հավաքականի նորանշանակ գլխավոր մարզիչ Արթուր պետրոսյանը վստահ է, որ իր աշխատանքն ազգային թիմի հետ արդյունավետ կլինի, քանզի ծանոթ է ֆուտբոլիստների հնարավորություններին և գիտե, թե ինչի է ունակ այս հավաքականը: Այս մասին մարզիչը նշել է` լրագրողների հետ այսօր կայացած հանդիպման ժամանակ:

«Գիտեք, միշտ էլ խաղային օղակների հետ կապված խնդիրներ եղել են, կան ու կլինեն: Մենք պետք է փորձենք օգտագործել այն, ինչ այս պահին ունենք` առկա բացերը լրացնելու համար: Մոնտենեգրոյի հետ կայանալիք խաղին անպայման փոփոխություններ կլինեն: Հարկավոր է ներգրավվել նաև երիտասարդ ֆուտբոլիստներին, որովհետև իրենք են ապագան: Պետք է քայլեր կատարվեն այդ ուղղությամբ և, փառք Աստծո, նրանց հետ աշխատելու փորձ ևս ունենք»,- ասաց Պետրոսյանը:

Իսկ թե ի՞նչ ֆուտբոլ է դավանում ինքն ու ի՞նչ սպասենք հավաքականից, Արթուր Պետրոսյանն ասաց հետևյալը.

«Ինչպես բոլորը, ես ևս բացառություն չեմ, և ուզում եմ, որ Հայաստանի հավաքականը հարձակվողական ֆուտբոլ խաղա, գնդակին ավելի շատ տիրապետի, քան մրցակիցը, բայց այստեղ ամեն ինչ կախված է, թե ինչ ֆուտբոլիստներ ունենք, հակառակորդն ինչպես է խաղում, որպեսզի կարողանանք տվյալ խաղի մարտավարությունը մշակել և հաջողության հասնել»:

Այն հարցին, թե որքանով է ծանոթ մարզիչը Հայաստանի առաջնությանը, քանզի ֆուտբոլիստները պետք է ընտրվեն և հրավիրվեն նաև տեղական թիմերից, Արթուր Պետրոսյանը պատասխանեց, որ մինչ այժմ հետևել է ներքին առաջնությանը և այդ առիթով ունի իր տեսակետը:

«Ամեն ինչ շատ արագ ստացվեց: Գործի բնույթով վերջին շրջանում չեմ կարողացել ինտենսիվ հետևել Հայաստանի առաջնությանը, սակայն հնարավորինս ուշադիր եղել եմ: Իհարկե, ոչ այնքան, որքան ես ինքս կցանկանայի: Ձեռքի տակ ունեմ անհրաժեշտ տեսագրություններ` ֆուտբոլիստների խաղին հետևելու համար, խոսել եմ ակումբների մարզիչներից որոշների հետ, այնպես որ տեղեկատվության կարիք չեմ ունենա: Հավաքականի առաջիկա խաղից հետո արդեն տեղում կհետևեմ հանդիպումներին և ինքս կդիտեմ և կուսումնասիրեմ ֆուտբոլիստներին»,- ասաց նա:

Իսկ ինչ վերաբերում է ազգային հավաքականի մրցելույթներին, ապա նորանշանակ մարզիչը հայտնեց, որ հետևել է բոլոր խաղերին` բացառությամբ Ռումինիայի ընտրանու հետ կայացած տնային հանդիպմանը, որտեղ մեր թիմը զիջեց 0:5 հաշվով:

«Լավ է, որ այդ խաղը չեմ տեսել, իսկ ահա մնացած բոլոր դիմակայություններին հետևել եմ: Ֆուտբոլիստներին ևս ծանոթ եմ` բացառությամբ մի քանիսի: Թիմի մոտավորապես 80-90 տոկոսին գիտեմ: Տեղյակ եմ նրանց հնարավորություններին, կարողություններին, ըստ այդմ էլ կարող եմ վստահաբար ասել, որ մեր աշխատանքն արդյունավետ է լինելու»,- հայտնեց Պետրոսյանը:

Վերջում գլխավոր մարզիչը երկրպագուներին հրավիրեց ներկա գտնվել նոյեմբերի 11-ին կայանալի Հայաստան-Մոնտենեգրո հանդիպմանը` նշելով, որ ունեն երկրպագուների աջակցության կարիքը: Պետրոսյանը նշեց, որ հարկավոր է լավ խաղով ու արդյունքներով այնպես անել, որպեսզի հիասթափված ու որոշ չափով ագրեսիվ տրամադրված երկրպագուները կրկին մեծ քանակությամբ գան մարզադաշտ և աջակցեն ազգային հավաքականին: