Ձեր վստահելի աղբյուրը

«Անծանոթ Երևան» հաղորդաշարի հեղինակ, լրագրող Մարկ Գրիգորյանը  Մեդիա կենտրոնում հրավիրած «Ե՞րբ է կարգավորվելու Երևանի կենտրոնի կառուցապատման գործընթացը» թեմայով քննարկման ժամանակ Քաղաքաշինության պետական կոմիտեի նախագահի խորհրդական Ռուզան Ալավերդյանին հարցրեց՝ ովքե՞ր են մեղավոր շենքի պայթեցման համար:

«Մենք իրավունք ունենք իմանալու՝ ովքե՞ր են մեղավորները: Սա ընդունեք հռետորական հարց, կամ հայտարարությւան»,-ասաց Գրիգորյանը:

Նրա համոզմամբ՝ Երևանի կենտրոնում փոփոխությունների պատճառն ու առիթը հսկայական կոռուպցիոն դաշտն է:

«Մենք բոլորս մարդ ենք, կարող ենք վախենալ դրա մասին խոսել, խուսափել դրա մասին հրապարակայնորեն խոսել: Ի վերջո այս սենյակում նստածներից միայն ես եմ, որ վերապրել եմ մահափորձից հետո, որը դեռ բացահայտված չէ: Դրա համար ես էլ եմ վախենում խոսել կոռուպցիայի մասին: Բայց եթե մենք բոլորս վախեցած մտնենք մեր բները, կոռուպցիան կշարունակվի: Մենք չգիտենք, չնայած իրավունք ունենք իմանալու, թե քաղաքի կենտրոնի որ հողակտորները, որ շենքերը ում են պատկանում, չգիտենք, թե դրանք ինչպես են սեփականշնորհվել, ինչ գումարներով են սեփականշնորհվել»,-ասաց քննարկման բանախոսը:

Անդրադառնալով օրեր առաջ Երևանի կենտրոնում առաջին տպարանի  շենքի պայթեցմանը, Մարկ Գրիգորյանն ասաց, մի քանի աղբյուրներում գրվեց նախկին քաղաքապետերից մեկի անունը՝ որպես սեփականատեր:

«Ինչպե՞ս եղավ, որ նախկին քաղաքապետի սեփականությունը չընդգրկվեց հուշարձանների ցուցակում: Մենք խոսում ենք խնդրի քաղաքական մասի վերաբերյալ, չենք խոսում կոռուպցիայի մասին: Ինձ թվում է՝ ժամանակն է խոսել, թե ինչպես է հայկական կոռուպցիան խժռում Երևանը: Վաղուց էր դրա ժամանակը, արդեն ժամանակն անցել է, բայց ինչ-որ մի պահի պետք է սկսել խոսել դրա մասին»,-ասաց նա:

Գրիգորյանի խոսքով,  պետական պահապանության տակ առնված հուշարձանների ցուցակը շենքերը փրկելու տարբերակ չէ, քանի որ կա գերակա շահ բառակապակցությունը, որն ուշադրություն չի դարձնում ցուցակին: