Ձեր վստահելի աղբյուրը

Նորք Մարաշում վնասազերծված ինված խմբի գործով կալանավորված պաշտպանության նախկին փոխնախարար Վահան Շիրխանյանը հաջորդ շաբաթ «Երևան-Կենտրոն» կալանավայրից ուղիղ միացմամբ ասուլիս կտա: Այդ մասին Panorama.am-ին տեղեկացրեց Շիրխանյանի փաստաբան Հայկ Ալումյանը:

«Մենք ներկայացրել ենք դիմում, և վարչակազմը չի մերժել, որպեսզի այդ գործողությունը կատարվի», -ասաց Ալումյանը՝ տեղեկացնելով, որ Շիրխանյանն ասուլիսում ներկայացնելու է իր անհամաձայնությունը քրեական գործի հետ:

Փաստաբանի ներկայացմամբ, այժմ մնում է լուծվեն տեխնիկական որոշ խնդիրներ, ինչից հետո պարզ կլինի, թե երբ կնշանակվի ասուլիսը:

Դիտարկմանը, թե նախադեպ է կալանավայրից ասուլիս տալը, Ալումյանը արձագանքեց.«Դուք այս գործով շատ բաներ կտեսնեք, որ մինչև հիմա չեն եղել: Նման կանխատեսումներ ունեմ»:

Փաստաբանը, սակայն, չմանրամասնեց՝ ինչեր են սպասվում այս քրեական գործի շրջանակներում:

Վահան Շիրխանյանին առաջադրվել էր մեղադրանք ՀՀ քրեական օրենսգրքի 223-րդ հոդվածի 2-րդ մասի հատկանիշներով՝ Արթուր Վարդանյանի կողմից ստեղծված հանցավոր համագործակցությանը մասնակցելու, դրա օգտին գործելու, կոնկրետ հանձնառություն և դերակատարություն ունենալու համար:

Ըստ նախաքննական մարմնի, Նորք Մարաշում նոյեմբերի 25-ին վնասազերծված զինված խմբի, թիրախում եղել են քաղաքացիներ, իշխանության առանձին ճյուղեր, ու պետական մարմիններ: Այդ գործի շրջանաներում կալանավորվել են 2 տասնյակից ավելի անձինք, այդ թվում նաև` կանայք: Վահան Շիրխանյանը առողջական լուրջ խնդիրներ ունի և կալանքի տակ գտնվելով նա նույնիսկ վիրահատության է ենթարկվել: