Ձեր վստահելի աղբյուրը

Ազգային ժողովում 2017 թվականի բյուջեի նախագծի քննարկման ժամանակ պատգամավոր Վահե Հովհաննիսյանը նշեց, որ բժշկության մեջ կան ոլորտներ, որտեղ կան լուրջ արդյունքներ, սակայն կան ոլորտներ, որտեղ վիճակը տխուր է, մասնավորապես, ուռուցքաբանության ոլորտում:

«Այս հարցը տարբեր նախարարների տալիս ենք, լսում ենք, որ կառուցվում է Գերազանցության կենտրոն, որը դարձել է Հյուսիս-հարավ ճանապարհը, վերջը չի երևում: Այստեղ մեկ ուրիշ լուծում է պետք, մենք չենք կարող անվերջ սպասել: Ի վերջո,  ե՞րբ Հայաստանում հնարավոր կլինի որակյալ բուժում կազմակերպել»,- ասաց պատգամավորը:

Առողջապահության նախարար Լևոն Ալթունյանը նշեց, որ կարելի է բացել ուռուցքաբանության գերազանցության երկրորդ, երրորդ կենտրոնը, բայց եթե ավելանում է ուռուցքների առաջնային դիագնոստիկայի քանակը, ապա դրա դեմ պետք է պայքարել այլ մեթոդներով. «Աշխարհում զարգանում են ոչ ինֆեկցիոն հիվանդությունների կանխարգելման մեթոդները: Քիչ գումարներով կարելի է այսօրվա առաջնային խնդիրներով հիվանդությունները կանխել շաքարային դիաբետը, քաղցկեղը, սիրտ-անոթային համակարգի հիվանդությունները»:

Լևոն Ալթունյանը հիշեցրեց, որ առողջ ապրելակերպը ծխախոտից հրաժարվելն է, խմիչքի օգտագործման նվազեցումն է, առողջ սնունդը, ֆիզիկական ակտիվությունը: Ըստ նրա՝ Ֆինլանդիան 25 տարվա ընթացքում 3,2 անգամ նվազեցրել  է սիրտանոթային հիվանդացություններից մահացությունը՝ միայն սննդի մեջ աղի քանակը պակասեցնելով:

Հայաստանում էլ, ըստ նախարարի, առաջարկ կա կտրուկ բարձրացնել ծխախոտի գները: 

Վահե Հովհաննիսյանը արձագանքեց. «Ֆիննը որ հիվանդանում է, չեն ասում ՝ այ ֆին ջան, եթե դու չծխեիր, չխմեիր…նրան սկսում են անմիջապես բուժել: Իսկ Հայաստանում Աստված չանի մեզնից որևէ մեկը լինի՝ ոչ բոլորն են կարողանում գնալ Գերմանիա, Մոսկվա՝ բուժման: Կարճաժամկետ լուծումներ է պետք, պետությունը նրա համար է, որ լուծի: Մարդիկ հիվանդանում են՝ չգիտեն ինչ անեն՝ սկսած խայտառակ դեղերից, որ դրսից բերեք, մերը լավը չի, սկսած ճառագայթային թանկ բուժումը, վիրաբուժությունը և այլն»: 

«Համամիտ եմ ձեզ հետ, բայց առանց համապատասխան ֆինանսական բազիսի խոսքերը մնում են խոսքեր, ցանկությունները մնում են կենացներ: Համապատասխանաբար, բազիսը պետք է լինի գումարը, մենք ունենք 85 մլրդ դրամ: Այդ 85 մլրդ-ը կհերիքի կամ շատ սահմանափակ քանակի մարդկանց բուժմանը, կամ ամբողջ ազգաբնակչությունը վերածել առողջ ապրելակերպի, կամ օպտիմալ համամասնորեն պետք է մասնաբաժիններ հանենք այս կամ այն ծրագրին, ինչը որ մենք անում ենք: Մենք պետք է ընտրենք»,- պատասխանեց Լևոն Ալթունյանը:

Պատգամավոր Մկրտիչ Մինասյանը նույնպես անդրադարձավ ուռուցքաբանությանը՝ նշելով, որ Հայաստանում քաղցկեղով հիվանդ մարդիկ բուժվելու համար իրենց բնակարաններն են վաճառում, որպեսզի գնան արտասահման բուժվելու:

«Պետությունը պետք է որոշակի քայլեր ձեռնարկի, որպեսզի մարդիկ հնարավորություն ունենան քիչ ծախսերով իրենց հայրենիքում բուժում ստանան: Առավել ևս մեր բժիշկները համապատասխան սարքավորումներ ունենալով, կարող են որակյալ բուժում տրամադրել»,- ասաց պատգամավորը:

Լևոն Ալթունյանը ընդունեց, որ իսկապես մարդիկ բնակարանները վաճառում են, որպեսզի արտերկրում բուժվեն, քանի որ արտերկրում այդ հիվանդության բուժման արժեքը 50-250 հազար եվրո է:

«Հայաստանում այդ բուժումը ձեռք է բերվում անվճար: Քոմենթները, իմ կարծիքով, ավելորդ են: Եթե ՀՀ ցանկացած քաղաքացի վճարեր օնկոլոգիայի հիվանդության բուժման համար Հայաստանի տարածքում 20-30 հազար եվրո, մենք ընդհանրապես այլ պատկեր կունենայինք օնկոլոգիայի բուժման գործընթացի մեջ: Մենք փորձում ենք դա անվճար անել, ստացվում է այն, ինչ որ ստացվում է: Մենք չենք ստիպում, որ մարդիկ վաճառեն իրենց տները, ավտոմեքենաները, փոխեն իրենց ապրելակերպը, բնակվելու վայրը: Պետությունը ջանք է թափում, որպեսզի այդ ամեն ինչը կազմակերպի անվճար»,- ասաց Լևոն Ալթունյանը: