Ձեր վստահելի աղբյուրը

Ճարտարապետության ու քաղաքաշինության ոլորտում մենք շատ օրենքներ ունենք, հիմա էլ մշակվում են, մի մասը ուշացած,  բայց հարցն այն է, այդ օրենքները գործո՞ւմ, գործելո՞ւ են, թե՞ չէ: Մեդիա կենտրոնում քննարկում «Ե՞րբ է կարգավորվելու Երևանի կենտրոնի կառուցապատման գործընթացը» թեմայով քննարկման ժամանակ նման հարց հնչեցրեց  Ճարտարապետ Սաշուր Քալաշյանը:

«Ես մի թեթև անալիզ արեցի: Մենք 98 թվին ընդունեցինք «Հուշարձանների պահպանության մասին» օրենք: Չորս տարի անց ընդունեցինք հուշարձանների պահպանության կարգ, թե ինչպես է այդ օրենքը գործելու: Եվս երկու տարի հետո՝ 2004-ին ընդունեցինք հուշարձանների ցանկը: Դրանով ավարտվեց»,-ասաց ճարտաապետը:

Դրան հաջորդած 12 տարիների ընթացքում, Ս. Քալաշյանի դիտարկմամբ, տեղի ունեցած շարժը հակառական է, արդյունքը՝ բացասական:

«Ցանկը հաստատվելուց հետո ընդունվեց գերակա հանրային շահի մասին օրենքը, որն էլ ոտատակ տվեց այս բոլոր նախաձեռնությունները»,-ասաց քննարկման բանախոսը:

Նա լրագրողների հետ հանդիպմանը էր եկել Ղարսի նահանգի ճարտարապետական հուշարձանների մատյանը ձեռքին:

«Մատյանի մեջ տուն առ տուն, եկեղեցի առ եկեղեցի, Անիից սկսած բոլոր շենքերի անձնագրերն են, առկա վիճակն ու վերանորոգման աշխատանքների մասին տեղեկություններ: Սա ձևական չէ, ես եղել եմ Ղարսում, տեսել, թե ինչպես են տները պահպանվում»,-ասաց նա:

Ճարտարապետի խոսքով, պետք է նման հոգածություն ցուցաբերել Հայաստանի բոլոր շենքների նկատմամբ, մինչդեռ այսօր շատ քաղաքապետեր չգիտեն, թե որտեղ են իրենց ղեկավարած համայնքի գլխավոր հատակագծերը: