Ձեր վստահելի աղբյուրը

Ազգային ժողովում 2017 թվականի բյուջեի քննարկման ժամանակ ՀԱԿ խմբակցության պատգամավոր Լյուդմիլա Սարգսյանը ՀՀ առողջապահության նախարար Լևոն Ալթունյանին հարցրեց պետպատվերից և ոլորտի ատկատներից:

«Պետպատվերի շրջանակում դիմումները մերժում են ստանում դեռ օգոստոս-սեպտեմբեր ամիսներին, քանի որ  վաղուց ատկատի մեխանիզմը ներդրված է եղել նախարարությունում, և դա բավարարել է բոլոր նախարարներին, վարչության պետերին, ուստի դրա դեմ պայքար չի տարվել»,- ասաց պատգամվորը:

Նա հիշեցրեց, որ մի քանի տարի առաջ, երբ առողջապահության նախարար էր  Դերենիկ Դումանյանը, ինքն այդ հարցը բարձրացրել է, արդյունքում, բանավեճ է եղել և այդ հարցով երկուսն էլ դիմել են դատախազություն. «Պարոն Դումանյանը դիմել էր, որ ստուգեն հիվանդանոցները, ես դիմել էի, որ ստուգեն նախարարություն-հիվանդանոց կապը: Դատախազությունից որևէ տեղեկություն անձամբ ես չեմ ստացել: Ուղղակի հայտնեցին, որ զբաղվում են այդ հարցով, և անցել է 3 տարի, բայց որևէ տեղեկություն չկա»:

Լյուդմիլա Սարգսյանը դիմելով նախարարին՝ ասաց, որ նախարարին ուզում է գործընկեր տեսնել, ոչ թե՝ հակառակորդ:  «Ուզում եմ հավատալ, որ դուք կդիմեք դատախազություն և կփորձեք ճշտել, թե ինչ արդյունքներ կան: Համոզված եմ, որ ոչինչ չեն արել, բայց ուզում եմ միասին պայքարել այդ երևույթի դեմ»,- նշեց պատգամավորը:

Լևոն Ալթունյանը հավաստիացրեց, որ զորակից են այդ հարցում, ապա հավելեց. «Ինչ վերաբերում է հարցին, որ զորակցենք Ձեզ՝ հետաքննելու նախկինը, եթե Դուք մեզանից սպասում եք ինչ-որ արդյունավետություն՝ բժշկությունը մի այլ աստիճանի հանելու հարցում, թողեք մեզ այդ գործառույթները, ոչ թե անցյալը փորփրելը»:

Լյուդմիլա Սարգսյանն արձագանքեց. «Քանի դեռ անցյալը մաքրված չէ, ներկան վստահություն չի կարող ներշնչել: Երբ անցյալը չի բացահայտվում, ներկան հուսադրող չէ»:

ԲՀԿ պատգամավոր Միքայել Մելքումյանն էլ հետաքրքվեց մարզային հիվանդանոցներից. «Մարդիկ պետք է վստահեն մարզային հիվանդանոցներին: Փետրվար-մարտին մարզի բնակիչներին հերթագրում են  սեպտեմբեր-հոկտեմբերի համար, և նա ստիպված գալիս է քաղաք, որպեսզի մաշեցնեն պետպատվերը և անցնեն կանխիկ դրամաշրջանառության ծառայություն մատուցելուն: Կարևոր խնդիր է, որ մարզի բնակիչը կարողանա որակյալ ծառայություն ստանալ տեղում, այլապես մարզային հիվանդանոցների հետ կապված անվստահությունը միշտ ուղեկցելու է մեզ»:

Միքայել Մելքումյանը առողջապահության նախարարին նաև հարցրեց, թե չեն կարող, արդյոք, «յոլա գնալ» առանց առողջապահական պետական գործակալության:

Լևոն Ալթունյանը պատասխանեց. «Առանց Լևոն Ալթունյանի դուք յոլա կգնանք, առանց առողջապահության նախարարի՝ ոչ, առանց առողջապահության պետական գործակալության յոլա կգնաք, առանց այն գործառույթների, որը կոչված է կատարելու այդ գործակալությունը՝ ոչ»:
Նախարարի խոսքերով՝ գոյություն ունեցող ֆինանսավորման համակարգը չի խթանում բուժհաստատությունների զարգացմանը, որոշ դեպքերում` նույնիսկ արգելակում է:

Լ.Ալթունյանը նշեց, որ նախարարությունը Կառավարությանն է ներկայացնելու առաջարկ, որպեսզի փոխվի ֆինանսավորման մոտեցումը՝  լինի ոչ թե բուժհաստատություններին բյուջե տրամադրելով, այլ ուղղակի հատկացումներ լինեն յուրաքանչյուր հիվանդի դիմումի համար:
Միքայել Մելքումյանը նախարարին հորդորեց, թե ինչ անում են՝ արագ անեն և որակյալ:

Լևոն Ալթունյանն էլ արձագանքեց. «Մենք դա հաշվի կառնենք, բայց ուզում եմ նկատի ունենաք, որ սենց թե նենց երեխան ծնվում է 9 ամսում, թույլ տվեք երեխան հասունանա, և ծնվի առողջ ու երկարակյաց»:

Ըստ նրա՝ «արագ և որակով» սկզբունքը կարող է հակասական լինել ու անարդյունավետ: