Ձեր վստահելի աղբյուրը

«Հովհաննես Հարությունյանի ոտքը, մեր կարծիքով, լավ է, շատ լավ էլ ծալում է ծնկի շրջանում, անդամահատելու կարիք չկա: Բայց նաև ինքը պետք է անձամբ աշխատի այդ ոտքի հետ», -Panorama.am-ի թղթակցի հետ զրույցում ասաց «Էրեբունի» բժշկական կենտրոնի տնօրեն գործադիր տնօրեն Միքայել Մանուկյանը՝ մեկնաբանելով «Սասնա ծռերի» անդամ Հովհաննես Հարությունյանի շուրջ ստեղծված իրարանցումը:

Ավելի վաղ Panorama.am-ը տեղեկացրել էր, որ Հովհաննես Հարությունյանի քույրը հայտարարություն էր տարածել տեղեկացնելով, որ Հովհաննեսի վիրավոր ոտքը «սև է ու սառը» և եղբայրը պահանջում է նույնիսկ անդամահատել այն:

Ավելին, երեկ Հովհաննեսի փաստաբան Հայարփի Սարգսյանը հայտարարել էր, որ իր պաշտպանյալի վիրավոր  աջ ոտքը զգալիորեն բարակել է մինչև կոնքազդրը, ոտքի մաշկի գույնը մգացել է, բացի այդ, չի կարողանում հենվել այդ ոտքի վրա: «Ասում է՝ կարծես ինչ-որ բան կախված լինի վրայից, կամ բուժեք կամ հեռացրեք», -ասել էր փաստաբանը:

Բժիշկը պնդեց, որ իրենց կողմից արված բուժումից հետո հերթը Հովհաննեսինն էր, և ինքը պետք է աշխատեր ոտքի հետ, վարժություններ կատարեր ոտքով, որպեսզի «ոտքի քառագլուխ մկանը ատրոֆիայի չենթարկվեր»: Ատրոֆիան, նշենք, ապաճն է, երբ մարդկանց օրգանների ու հյուսվածքների չափերը փոքրանում են:

Նրա խոսքով, այդպես իրենց վրա աշխատեցին Պավել և Արամ Մանուկյաններն ու Արմեն Լամբարյանը, որոնց վնասվածքները «հազար անգամ ավելի ծանր էին»:

«Ցավում եմ, բայց էնտեղ (Դատապարտյալների հիվանդանոց ՔԿՀ-ում-հեղ.) մի քանի հիվանդ է պառկած, որոնք ավելի բարդ կոտրվածքներ ունեն, և իրենք այդ վարժություններն անում են ու արդյունքում հիմա, փառք Աստծո, քայլում են:

Հովհաննեսին երկու օր առաջ մեր րեաբիլիտոլոգները, տրավմատոլոգները կրկնակի նայել են, և խնդիրն այն է, որ ոչ մի սևացման հարց չկա, որ ոչ մի ոտ հեռացնելու հարց չկա, դա բացառված բան է: Խնդիրն այն է, որ երբ կոտրվածք է լինում, գիպս է դրվում, մկանները չեն աշխատում և հիմա երբ բոլորը հանված են, ուղղակի նա պետք է կամաց-կամաց աշխատի իր մկանների հետ, վարժություններ անի:

Դրանք բարդ վարժություններ չեն, դրանց համար հատուկ մասնագետ պետք չի, ունեցել ենք նման ծանր հիվանդներ, ովքեր տանն են արել այդ վարժությունները: Եվ Հովհաննեսը, և իր պաշտպանը ոչ մի կերպ չեն ուզում համոզվել, որ  դա է պետք անել: Ես չգիտեմ՝ ինչ անեմ, ինչպես նրանց համոզեմ», -վիճակը ներկայացրեց Միքայել Մանուկյանը:

ԲԿ-ի գործադիր տնօրենի պնդմամբ, Պավել Մանուկյանը, Արամ Մանուկյանը և Արմեն Լամբարյանը լսող հիվանդներ են եղել ու աշխատել են իրենց վրա:

«Որպես հիվանդ Արամ Մանուկյանը դուխով տղա էր ու դեռ մի բան էլ ինքն էր մեզ դուխ տալիս, հազար անգամ ավելի բարդ կոտրվածքով մի օր, մի անգամ էդ տղեն ծպտուն չհանեց, մեր բոլոր ասածներն արեց և հիմա, փառք Աստծո, անգամ իր պաշտպանն է ասում, ամեն ինչ լավ է: Բա էդ ո՞նց եղավ: Ինչի՞ հենց Հովհաննեսը», -նկատեց Մանուկյանը:

Ինչ վերաբերում է երկրորդ անգամ չվիրահատելուն, ինչը Հովհաննեսի հարազատների ու պաշտպանի համար տարօրինակ էր ընկալվել, բժիշկն ասաց, որ հայտնի մասնագետների հետ քննարկվել է և որոշվել է Հարությունյանին երկրորդ անգամ չվիրահատել:

«Ես կանչել եմ բոլոր լուրջ տրավմատոլոգներին, անգամ Հայաստանի գլխավոր տրավմատոլոգին: Նրանք բոլորը միանշանակ ասել են, որ պետք չէ վիրահատել, թողեք հանգիստ կպնի ոտքը», -նշեց մասնագետը: