Ձեր վստահելի աղբյուրը

«Բացարձակ այն զգացողությունը չկա, որ Ձեր ասածները դառնալու են իրականություն»,- այս մասին այսօր Ազգային ժողովում 2017 թվականի պետական բյուջեի նախագծի քննարկման ժամանակ  ասաց ՀԱԿ խմբակցության պատգամավոր Արամ Մանուկյանը՝ դիմելով ՀՀ տնտեսական զարգացման և ներդրումների նախարար Սուրեն Կարայանին:

«Նախարարությունը կոչվում է տնտեսական զարգացման և ներդրումների, բայց ոչ զարգացումը կա, ոչ էլ ներդրումները: Դրա համար եմ Ձեր համարձակության վրա իսկապես  նախանձում: Լավ, ռիսկի եք գնացել, բայց երկու բան չեք ցանկանում անել. ասում եք՝ իրավիճակը վերլուծում ենք, բայց դուք այդ վերլուծության գնահատականը ունե՞ք: Վերջին մի քանի տարիների ընթացքում ՀՆԱ-ի նկատմամբ ներդրումները 40%-ից նվազել են 20%-ի: Կարող եք ասել՝ ինչո՞ւ, կարո՞ղ եք ձեր վերլուծության արդյունքը խորհրդարանին ներկայացնել, թե ինչո՞ւ է երկու անգամ մեր ներդրումների  մակարդակը նվազել»,- ասաց Արամ Մանուկյանը:

Ըստ պատգամավորի, եթե այսօրվա վիճակը չեն համարձակվում գնահատել ճգնաժամային, այսինքն՝ չեն ցանկանում տալ ճշգրիտ դիագնոզ, ապա նախարարի առաջարկած «բուժիչ դեղերը, ռեցեպտները» համոզիչ չեն: «Դրա համար եմ ասում, որ ձեր ասածը համոզիչ չէ: Ձեր համարձակությունը չի հերիքում՝ ասելու այսօրվա իրական վիճակը»,- ընդգծեց Արամ Մանուկյանը՝ հավելելով, որ եթե համեմատում են հարևան երկրների հետ, ապա Հայաստանն ընդհանրապես մրցունակ չէ, չունի որևէ միջազգային նախագիծ, որի համար մի քանի տարի հետո գրավիչ կլինի և գումարներ կգան մեր երկիր:

Պատգամավորը նաև հարցրեց՝  եթե հայաստանցիների գումարը պաշտպանված չէ և դուրս է  հոսում թե բիզնեսը, թե կանխիկ գումարը, ապա այդ դեպքում ինչո՞ւ պետք է ներրդրումներ անվեն, եթե բիզնեսը ապահովագրված չէ: «Օրինակ՝ միայն Վրաստանը Մետաքսի ճանապարհի համար բերում է 42 մլրդ դոլարի նախագիծ, իսկ դուք ի՞նչ եք արել: Այս ամբողջ ընթացքում մի հատ Մետաքսի ճանապարհ չլսեցի, բայց դա միջազգային նախագիծ էր, որ Հայաստանով էր գնում:  Վրաստանն այս տարի 6 մլն տուրիստ բերեց, իսկ ամեն մի տուրիստը գողվազդ է, ներդրումների միջոց է: Հայաստանի մշակո՞ւյթն է թույլ, ոչ արժեքավոր, որ Վրաստանից այսքան հետ ենք: Որտե՞ղ է ձեր ռազմավարությունը, որ ասում եք գրավիչ է լինելու: Մեր բիզնեսը փախնում է Վրաստան, Ռուսաստան, տարեկան 1,5 մլրդ դոլար դուրս է գնում, կարո՞ղ եք կանգնեցնել: Դա արեք, հետո նոր զարգացման ծրագրեր ներկայացրեք»,- ասաց Արամ Մանուկյանը:

Սուրեն Կարայանը հայտնեց, որ պատրաստ են առանձին քննարկումներ անցկացնել և մանրամասն ներկայացնել ծրագրերը: «Այո, մենք պետք է տանք ճիշտ դիագնոստիկա, դրա մասին բազմիցս կառավարությունը հայտարարել է և ներկայումս այդ գործընթացի մեջ ենք: Դրանից հետո մենք պետք է վեր հանենք այն միջոցառումները, որոնք պետք է իրականացնենք»,- ասաց նախարարը՝ հավելելով, որ պատրաստ է Ազգային ժողովում ներկայացնել բոլոր վերլուծությունները և որևէ խնդիր չունեն, որպեսզի չբարձրաձայնեն այն իրավիճակը, որում այսօր հայտնվել ենք:
 
Նշենք, որ ՀՀ տնտեսական զարգացման և ներդրումների նախարարության կողմից իրականացվող ծախսային ծրագրերի համար 2017 թ. նախատեսվում է հատկացնել 2 մլրդ 649 մլն դրամ` 2016 թ. պետական բյուջեով հաստատված 2 մլրդ 991 մլն դրամի դիմաց: Ծախսերի նվազումը 2016 թ. պետական բյուջեի համապատասխան ցուցանիշի նկատմամբ կազմում է 342 մլն դրամ կամ 11.4 %: