Ձեր վստահելի աղբյուրը

Մենք  հիմա փորձելու ենք ձևավորել որոշակի քաղաքականություն՝ ներկայացումների  բովանդակության հետ կապված, թեպետ՝ մենք չպետք է խառնվենք բովանդակությանը, օրենքով է այդպես սահմանված, - Գաբրիել Սունդուկյանի անվան ազգային ակադեմիական թատրոնում   շրջայց կատարելուց հետո լրագրողների հետ զրույցում ասաց մշակույթի նախարար Արմեն Ամիրյանը՝ պատասխանելով  հարցին, թե արդյո՞ք այժմ ավելանալու են ձեր պահանջները թատրոնից:

«Մենք համագործակցաբար պետք է շարունակենք զբաղվել նախ ճիշտ ներկայացումներ բեմադրելով, ճիշտ PR իրականացնելով, արվեստի կառավարման մասնագետներ ներգրավելով, որպեսզի կարողանանք բավարար  հանդիսատեսի բերել թատրոն»,- նշեց նախարարը:

Արմեն Ամիրյանը նաև խաղացանկերի թարմացման խնդիր է տեսնում:

«Կրկնում եմ՝ ստեղծագործական մասին նախարարությունը չի խառնվում, բայց մենք ձևավորում ենք պատվերներ, և պետք է խաղացանկերը  թարմանան՝  դառնալով այսօրվա պահանջներին համապատասխան,  անշուշտ, իր մեջ ներառելով այն գաղափարային հաղորդագրությունը, որը պետությունն ուզում է փոխանցել ժողովրդին:  Խոսքը վերաբերում է  ազգային թեմաներին:  Այդ թեմաներն այնպես չէ, որ պետք է թատրոնը պարզապես բեմադրի: Հաճախ ունենում ենք բեմադրություններ, պատվերներ, որոնք, առաջնախաղից հետո 1-2 անգամ ներկայացնելով  հանդիսատեսին, այևս չեն շարունակվում: Նման   բան չպետք է լինի, պետք է բեմադրենք այնպիսի ներկայացումներ, որոնք կունենան հաջողություն՝ ընդունելու  տարիներ շարունակ լեցուն դահլիճներ»,- ասաց մշակույթի նախարարը:

Թատրոնի վերանորոգման աշխատանքը սկսվել էին 2015թ. հոկտեմբերից: Թատրոնի վերազինման ծրագրի շրջանակում Հայաստանի  մշակույթի նախարարության և «Վագներ-Բիրո Ավստրիա սթեյջ սիսթեմս ԷյՋի», «Զալցբրեններ Սթեյջթեք աուդիո վիդեո մեդիասիսթեմս Ջիէմբիեյջ», «Էլեկտրոնիկ Թիեթր քոնթրոլս Ջիէմբիեյջ» և «Արթսթեք» ընկերությունների կոնսորցիումի միջև 2014 թվականին 23 տարի մարման ժամկետով կնքվել է 7 մլն եվրո արժողության՝ ապրանքի և ծառայության մատուցման պայմանագիր:
 2016 թվականի օգոստոսի 25-ին կնքվել էր աշխատանքի հանձնման-ընդունման արձանագրություն. դահլիճը պատրաստ է շահագործման և նորամուտը կտոնի «Պեպո» բեմադրությամբ: