Ձեր վստահելի աղբյուրը

Ծննդկան Մերի Մարգարյանի և նրա երեխայի մահվան գործով մեղադրյալ «Շենգավիթ» բժշկական կենտրոնի մանկաբարձ-գինեկոլոգ Շուշանիկ Բախշյանի պաշտպանությունն իրականացնող փաստաբանական խմբին վրդովեցրել է տեղեկությունը, որ Առողջապահության նախարարը հանդիպել է գործով տուժողի իրավահաջորդ Վաղինակ Մարգարյանին:

Այդ մասին Panorama.am-ին փոխանցեց դատարանում Բախշյանի պաշտպանությունն իրականացնող փաստաբան Ալեքսանդր Սիրունյանը:

Վաղինակ Մարգարյանը, հիշեցնենք, Մերի Մարգարյանի հայրն է և դատարանում տուժողի իրավահաջորդն է:

Սիրունյանի գնահատմամբ՝  դատական քննության ընթացքում դատավարության կողմի հետ հանդիպումը չի բխում արդար դատաքննության շահերից:

Նրա խոսքով, Բախշյանի պաշտպանական թիմը նամակ է ուղարկել առողջապահության նախարար Լևոն Ալթունյանին:

«Ցանկանում եմ Ձեր ուշադրությունը հրավիրել այն հանգամանքի վրա, որ Մերի Մարգարյանի մահվան վերաբերյալ քրեական գործը այժմ գտնվում է դատաքննության փուլում, ուստի, գտնում եմ, որ դատարանում քննվող գործով կողմերից մեկի հետ քննարկումներ կազմակերպելը չի բխում կողմերի հավասարության սկզբունքից:

Ավելին, հարգելի պարոն նախարար, դատարանում քրեական գործի քննությանը զուգահեռ, գործադիր իշխանության մարմնում, այն էլ՝ այդ մարմնի ղեկավարի մոտ, քննարկումներ կազմակերպելը առհասարակ չի բխում արդարադատության շահերից, ուստի այն գտնում եմ անթույլատրելի», -նամակում նշել են Բախշյանի պաշտպանները:

Նկատենք, որ Մերի Մարգարյանի հայրիկի և Առողջապահության նախարարի միջև տեղի ունեցած հանդիպման մասին ավելի վաղ հայտարարել էին առողջապահության նախարարությունից: ԱՆ-ից նաև ասել էին, որ նախարարը ծրագրում է հանդիպումներ ունենալ նաև այս տարի մահացած մյուս երկու ծննդկանի հարազատների հետ:

Նշենք նաև, որ Մերի Մարգարյանի գործով ամբաստանյալ մանկաբարձ-գինեկոլոգ Շուշանիկ Բախշյանը այժմ շարունակում է աշխատել «Շենգավիթ» բժշկական կենտրոնում և նրա նկատմամբ որպես միակ խափանման միջոց ընտրվել է ստորագրությունը՝ չբացակայելու մասին: