Ձեր վստահելի աղբյուրը

«Առողջապահության նախարար Լևոն Ալթունյանը պլանավորում է  վերադառնալ վաղը, կարծում եմ՝ հենց վաղն էլ այդ հանդիպումը տեղի կունենա: Իսկ թե ինչու մահացած երեք ծննդկանի հարազատների հետ, որովհետև հենց այդ երեք դեպքն էր բարձրացվում լրագրողների կողմից»,- «Առողջապահությունը և մարդու իրավունքները» խորագրով միջազգային համաժողովի ժամանակ լրագրողների հետ զրույցում ասաց առողջապահության նախարարի տեղակալ Սերգեյ Խաչատրյանը՝ պատասխանելով լրագրողի հարցին, թե ինչո՞ւ է նախարարը միայն մահացած երեք ծննդկանի հարազատների հետ հանդիպելու:

Նշենք, որ ավելի վաղ առողջապահության նախարարությունից հայտնել էին. «Հաշվի առնելով, որ նոյեմբերի 4-ին Ազգային ժողովում ՀՀ առողջապահության նախարարի կողմից հնչեցված խոսքը տարընթերցման տեղիք է տվել, Լևոն Ալթունյանն, ով այս պահին բացակայում է երկրից, պատրաստվում է վերադառնալուն պես՝ նոյեմբերի 8-ին, ընդունել վերջին մեկ տարվա ընթացքում մահացած երեք ծննդկանի՝ Մերի Մարգարյանի, Տաթևիկ Գասպարյանի և Հռիփսիմե Նազլուխանյանի հարազատներին։  Նախարարը մահացած ծննդկանների հարազատներից կլսի նրանց մտահոգող հարցերը՝ հնարավոր աջակցություն ցուցաբերելու նպատակով։ Նշեմ, որ Մերի Մարգարյանի հայրը օրերս եղել է ընդունելության ՀՀ ԱՆ աշխատակազմի ղեկավարի մոտ»:

Հիշեցնենք, որ ԱԺ-ում 2017 թվականի պետական բյուջեի քննարկման ժամանակ լրագրողների հետ զրույցում առողջապահության նախարար Լևոն Ալթունյանն ասել էր. «Ես մեկ-երկու մահացած ծննդկանի դեպքով չեմ զբաղվում, դրանով զբաղվում են դատական մարմինները: Իմ համակարգը ամբողջ համակարգն է, ոչ թե մեկ-երկու բողոքավոր ծննդկանի բարեկամները։ Հասկացեք դա վերջապես: Մահվան դեպքում զբաղվում է դատավորը, մորգը…»:

Փոխնախարարի խոսքով՝ ծննդկանների մահացության դեպքերը նախարարության ուշադրության կենտրոնում է, խիստ քննության առարկա է:

«Այն տարընթերցումը և կարծիքները, որ ձևավորվեց, մի փոքր չի համապատասխանում իրականությանը: Իրականում նախարարի հետ բազմաթիվ անգամ խոսել ենք այս թեմայի շուրջ: Յուրաքանչյուր մահվան դեպք մեզ համար արտառոց դեպք է, իսկապես տրադեգիա է: Յուրանքայուր ծննդկանի մահ մեզ համար անձնական տրագեդիա է»,- ասաց Ս.Խաչատրյանը:

Նա նշեց, որ իր համար յուրաքանչյուր դեպքի հետ կապված կան երևույթներ, որոնց վեր հանումը շատ ավելի կարևոր է. «Այդ երևույթների վեր հանումը, վերլուծումը, դրանից եզրակացություններ անելն ու նման վերլուծությունների արդյունքում այդ փորձը տարածելով համակարգում՝ հնարավորություն ենք ունենում, որ նման սխալները չկրկնվեն: Այս ճանապարհին  մենք բավականաչափ լավ տվյալներ, արդյունքներ ունենք»:

Պատասխանելով հարցին, թե որքանո՞վ է պահպանվում բժիշկների կողմից պացիենտի իրավունքը և հակառակը,  ո՞վ է ավելի խոցելի, փոխնախարարն ասաց. «Երկուսն էլ շատ խոցելի են: Այս պահի դրությամբ, երբ որ կանոնակարգման դաշտը լիարժեք չէ, երկուսն էլ տուժում են: Բոլոր դեպքերում առողջապահական համակարգը գործում է մեր պացիենտների համար, մարդկանց առողջության պահպանման, բարելավման համար, դրա համար մեր գերակա խնդիրն այս պահին պացիենտի  իրավունքների պաշտպանությունն է:
Իրավունքն առանց պարտականությունների չի լինում, այս երկուսի բալանսի մեջ է: Բոլոր հարաբերություններում իրավունքի և պարտականությունների համակցումը, ճիշտ բալանսավորումը կբերի  նման խնդիրների բացառմանը»:

Ինչ վեաբերում է հարցին, թե արդյո՞ք  չեք պատրաստվում հանդես գալ օրենսդրական նախաձեռնությամբ՝ օրենքով ամրագրելու «բժշկի սխալ» եզրույթը, Ս.Խաչատրյանն ասաց, որ աշխարհի եզակի երկրներում է, որտեղ սահմանված կա այդ եզրույթը:

«Պետք է ուշադիր նայենք, թե ինչպես է այդ եզրույթն իրականում աշխատում: Երբ որ խոսում ենք բժշկական սխալի մասին, խոսում ենք այն սխալի մասին, երբ բժիշկն իր նորմալ գործունեության, պրոտոկալների հիման վրա իր աշխատանքի ընթացքում  իրականացնում է մի գործառույթ, որը  բերում է վատ արդյունքի: Ձևակերպել բժշկական սխալը որպես հատուկ կատարված գործողություն, դա մենք ունենք,  քրեորեն պատժելի գործունեություն է: Այո, «բժշկական  սխալ» եզրույթի քննարկման գործընթաց պետք է սկսել: Չգիտեմ՝ ինչով դա կավարտվի, արդյոք եզրույթը վերջնական օրենսդրորեն կամրապնդվի, թե  դա կթողնենք մեկ այլ դաշտում կարգավորման, բայց քննարկումները սվսվելու են»,- ասաց առողջապահության փոխնախարարը: