Ձեր վստահելի աղբյուրը

ԵԱՀԿ Մինսկի խմբի համանախագահներից մեկն է հույս հայտնել, որ դեկտեմբերին Համբուրգում կարող է կայանալ հանդիպում Հայաստանի և Ադրբեջանի ԱԳ նախարարների հետ: Իհարկե, այդ հույսին ի պատասխան Ադրբեջանից հնչեց հայտարարություն, որ պատրաստ են մասնակցելու, բայց Ադրբեջանից հնչող հայտարարությունները հակասություններ են  պարունակում,- Երևանում  Իտալիայի արտաքին գործերի և միջազգային համագործակցության նախարար Պաոլո Ջենտիլոնիի հետ  համատեղ ասուլիսում ասաց ՀՀ ԱԳ նախարար Էդվարդ Նալբանդյանը՝ պատասխանելով հարցին, թե  ԵԱՀԿ Մինսկի խմբի համանախագահները հայտարարել էին, որ դեկտեմբերին Համբուրգում կայանալու է  ՀՀ և Ադրբեջանի ԱԳ նախարարների հանդիպում, ի՞նչ ակնկալիք ունենք այդ հանդիպումից:

Նախարար Նալբանդյանի խոսքով՝ Ադրբեջանը մի կողմից   հայտարարում է, որ պատրաստ են մասնակցել եռանախագահների կողմից նախաձեռնվող հանդիպումներին, մյուս կողմից հայտարարություններ են անում, որոնք հակադրվում են եռանախագահների մոտեցումներին,  առավելապաշտական մոտեցումներ են արտահայտում և հայտարարում, որ ղարաբաղյան հիմնախնդրի լուծումը կարող է լինել միջազգային իրավունքի միայն մեկ սկզբունքի վրա:

«Եռանախագահները բազմիցս ասել են, որ հիմնախնդիրը կարող  է լուծվել միջազգային իրավունքի երեք սկզբունքի հիման վրա՝ ուժի սպառնալիքի չկիրառում, ինքնորոշման իրավունք, տարածքային ամբողջականություն: Բազմիցս հայտարարել են, որ այդ սկզբունքները և նաև այն տարրերը, որոնք հիմնված են այդ սկզբունքների վրա և ներկայացված են եռանախագահների կողմից, մեկ ամբողջություն են, փորձել տարանջատել այդ սկզբունքները, տարրերը մեկը մյուսից կստեղծի դժվար վիճակ»,- նշեց Է. Նալբանդյանը:

Նա ասաց, որ Բաքուն պետք է կողմնորոշվի՝ արդյոք իսկապես  ցանկանում է, որ եռանախագահող ձևաչափում շարունակի  բանակցությունները, որովհետև մի կողմից ասում են՝  պատրաստ են մասնակցելու հանդիպումներին, մյուս կողմից՝ դուրս են գալիս եռանախագահների առաջարկների դեմ, նաև՝ այն հիմքի դեմ,  որն առաջարկվում է որպես ղարաբաղյան հիմնախնդրի կարգավորում:

«Այլապես սոսկ այս հանդիպումներին մասնակցությունը դառնում է իմիտացիա իրենց կողմից: Դրա ապացույցներից մեկն էլ իրենց մասնակցությունն էր Վիեննայում, Սանկտ Պետեբուրգում կայացած գագաթաժողովներին: Մասնակցեցին, բայց դա ի՞նչ տվեց: Մինչ այսօր հրաժարվում են իրականացնել  ձեռք բերված պայմանավորվածությունները, անում են ամեն ինչ, որպեսզի այդ պայմանավորվածությունները կյանքի չկոչվեն»,- նշեց ՀՀ ԱԳ նախարարը:

Է. Նալբանդյանի խոսքով՝ ոմանք, ովքեր կասկածներ ունեին, որ Ադրբեջանը կարող է գնալ իրավիճակի կտրուկ սրման, հստակ ապացույցներ ստացան ապրիլի սկզբին Ադրբեջանի կողմից սանձազերծված լայնածավալ ռազմական   գործողությունների արդյունքում:

«Ապրիլյան ագերսիայից հետո եռանախագահների ջանքերը Հայաստանի հետ միասին ուղղված են նրան, որպեսզի համապատասխան  պայմաններ ստեղծեն հիմնախնդրի կարգավորման գործընթացն առաջ մղելու համար»,- ասաց նա:

Է. Նալբանդյանի խոսքով՝ Հայաստանը երբևէ չի հրաժարվել հանդիպումներից, բայց նաև՝ Հայաստանը մասնակցելով այդ հանդիպումներին, ընդունել  է այն շրջանակը, որն առաջարկվում է բանակցությունների համար  եռանախագահների կողմից:  Նա ընդգծեց, որ դա է տարբերությունը Հայաստանի և  Ադրբեջանի միջև:

«Հիշեցնեմ, որ մի քանի ամիս Ադրբեջանը հրաժարվում էր  ընդհանրապես եռանախագահների հետ հանդիպել՝ ասելով, որ նրանք դատարկ, անօգուտ զբոսաշրջիկներ են»,- նշեց Է. Նալբանդյանը:

Նա ասաց, որ Ադրբեջանը, ինչպես միշտ,  նորից սրում է իրավիճակը,  հիմա հայտարարել է լայնածավալ ռազմական զորավարժությունների մասին, որին մասնակցելու է ադրբեջանական բանակի ողջ ներուժը՝ 60 հազար զորք, տանկեր, հրթիռներ:

«Իհարկե, դա նաև խախտում է Վիեննայի փաստաթղթի, որի համաձայն պետք է իրենք 42 օր առաջ տեղյակ պահեն զորավարժություն անցկացնելու մասին, եթե զորքերի մասնակցությունը հասնում է 9 հազարի: Ոչ միայն տեղյակ չեն պահել, այլ Համբուրգից առաջ գնում են նման քայլի, որը սրում է իրավիճակը: Նաև սաստկացել են հրադադարի խախտումները թե շփման գծում, թե ընդհանրապես հակամարտության գոտում»,-հավելեց ՀՀ ԱԳ նախարարը:

Նա նշեց, որ դեռևս հստակեցված չէ  հանդիպման ֆորմանը, որը կարող է լինել Համբուրգում: