Ձեր վստահելի աղբյուրը

Այսօր շատ հիշարժան օր է: Կարելի է ասել, որ մենք թևակոխում ենք նոր փուլ,- Մարտիրս Սարյանի հիմնանորոգված տուն-թանգարանի բացման արարողությունից հետո լրագրողների հետ զրույցում ասաց տուն-թանգարանի տնօրեն Ռուզան Սարյանը:

«Մյուս տարի լրանում է մեր թանգարանի 50-ամյակն և 50-ամյակի շեմին մենք ստացանք արդիականացված շենք, որն ունի ամեն տեսակ հարմարություններ, այն ինչ միշտ երազել ենք: Թվում էր, թե դա անիրականանալի էր»,- նշեց նա:

Ռ.Սարյանի ներկայացմամբ՝ թանգարան ունի գրադարան-արխիվ, որտեղ կարելի է ծանոթանալ Սարյանի գրադարանին, նրա թողած հսկայական ժառանգությանը:

«Արվեստասեր հասարակաության առջև կբացվի Սարյանի ապրած տան հատվածը, կներկայացվի այն մթնոլորտը, որտեղ ապրել է վարպետ, իր հարազատների, մտերիմների, իր որդիների հետ»,- ասաց թանգարանի տնօրենը:

Նրա խոսքով՝ ունեն հրաշալի ցուցադրություն, վավերագրական նյութեր, որոնք ժամանակագրական կարգով ներկայացված են ցուցափեղկերի մեջ, կան բացառիկ նյութեր:

Մշակույթի նախարար Արմեն Ամիրյանն ասաց, որ շատ թանգարաններ ունեն վերանորոգման կարիք և այս հարցը կամաց-կամաց կլուծվի: Նա տեղեկացրեց, որ Սարյանի ընտանիքի կողմից շուրջ 100 կտոր թանգարանային նմուշ է նվիրաբերվել թանգարանին, ինչն այն դարձրել է ավելի գեղեցիկ և հետաքրքիր:

Թանգարանի հիմնանորոգման աշխատանքներն իրականացվել են ՀՀ 2013 թ. և 2015 թ. պետական բյուջեների միջոցների հաշվին, իսկ նոր ցուցադրության ձևավորումն իրականացվել է ՀՀ մշակույթի նախարարության և Սարյանի տուն-թանգարանի արտաբյուջետային միջոցների հաշվին: Ծրագրի ընդհանուր արժեքը  շուրջ 518.0 միլիոն դրամ է, որից 462.5 մլն դրամը ՀՀ պետական բյուջեով նախատեսված միջոցների հաշվին է, շուրջ 55.5 միլիոնը՝ արտաբյուջետային միջոցների հաշվին: