Ձեր վստահելի աղբյուրը

Եվրամիությունը լրջորեն մտահոգված է վերջերս Թուրքիայում տեղի ունեցող իրադարձություններով, այդ թվում՝ մահապատժի արգելքի վերացման մասին բանավեճով և ընդդիմադիր պատգամավորների ձերբակալություններով, ուստի կոչ է անում Անկարային պաշտպանել երկրում ժողովրդավարական նորմերն ու մարդու հիմնարար իրավունքները:

Այս մասին, ռուսական «ՌԻԱ Նովոսի» պարբերականի փոխանցմամբ, ասված է ԵՄ արտաքին քաղաքականության հարցերով հանձնակատար Ֆեդերիկա Մոգերինիի հայտարարության մեջ:

«ԵՄ-ն և նրա անդամ երկրները մեծ անհանգստությամբ են հետևում Թուրքիայում վերջին իրադարձություններին: Մահապատիժը վերականգնելու մասին առաջարկով հանդես գալու հնարավորության ուսումնասիրությունը, խոսքի ազատության, այդ թվում՝ սոցիալական ցանցերի շարունակվող սահմանափակումները, ԶԼՄ-ները փակելը, երկրում ամենախոշոր ընդդիմադիր Ժողովրդադեմոկրատական կուսակցության համանախագահների վերջերս տեղի ունեցած կալանավորումները, ինչպես նաև մի քանի խորհրդարանականների ձերբակալությունները ծայրահեղ անհանգստություն են առաջացնում, և կարող են թուլացնել իրավունքի գերակայությունը, մարդու իրավունքների և հիմնարար ազատությունների պաշտպանությունը:

ԵՄ-ն կարծում է, որ «տարածաշրջանի կայունության համար անհրաժեշտ է վերադառնալ վստահելի քաղաքական գործընթացի և իրական քաղաքական երկխոսության »,-նշված է Մոգերինիի հայտարարության մեջ: